.png)
Organizata Botërore e Shëndetësisë qortoi vendimin e vendeve të zhvilluara për të vaksinuar me dozat e treta qytetarët e tyre, ndërsa miliona të tjerë në mbarë botën nuk kanë marrë asnjë dozë.
OBSH thotë se nuk ka prova shkencore të mjaftueshme që të vërtetojnë se doza e tretë është aq e domosdoshme në luftën kundër pandemisë, ndërsa akuzoi autoritetet e vendeve të zhvilluara se po nxitojnë në këtë drejtim.
“Shpërndarja e dozave përforcuese të treta dhe të dyta për ata ta vaksinuar me Johnson&Johnson në një kohë që miliona të tjerë në botë presin marrjen e një doze të parë është imorale”, tha OBSH.
“Po u hedhim jelekë të tjerë shpëtimi njerëzve që e kanë tashmë një jelek shpëtimi, ndërsa njerëz të tjerë po mbyten”, tha Mike Ryan, drejtori i programit të emergjencave shëndetësore në OBSH.
Në fillim të muajit gusht, OBSH kërkoi një moratorium kundër dozave përforcuese. Kohëzgjatja e këtij moratoriumi të propozuar nga OBSH ishte deri në momentin kur të ishin vaksinuar me të paktën një dozë të gjithë qytetarët në vendet e varfra.
Vende si SHBA, Izraeli dhe Britania e Madhe kanë miratuar dozat përforcuese. Në Izrael numri i qytetarëve që kanë marrë dozat e treta ka shkuar në rreth 2 milionë vetë, ndërsa në SHBA është caktuar data 20 shtator për nisjen e këtij programi vaksinimi.
Për doza përforcuese po flasin gjithnjë e më shumë edhe vendet e Bashkimit Europian, si Gjermania e Franca, por që ende nuk kanë miratuar një program vaksinimi për to.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje