.png)
Pas tetë sezonesh, ka përfunduar “era” e Tiago Silvës te francezët e PSG-së. Sipas prestigjiozes “L’Equipe”, klubi i emirit të Katarit nuk ka në plan t’ia rinovojë kontratën që i skadon më 30 qershor futbollistit brazilian. PSG heq dorë kështu nga kapiteni dhe mbrojtësi që ka lënë gjurmë të rëndësishme gjatë periudhës që ka luajtur në Paris.
Në moshën 35-vjeçare, Tiago Silva ka përfunduar në merkato me parametra zero.
Lamtumira e mbrojtësit vjen paradoksalisht në fund të një prej sezoneve më të mira të tij që nga viti 2012, kur kaloi nga Milani te PSG-ja, bashkë me Ibrahimoviç. Braziliani vuri menjëherë autoritetin e tij në ekip dhe u gradua kapiten.
Ditët e fundit, me anë të rrjeteve sociale nga Brazili, ku qëndron që pas mbylljes së kufijve, Tiago Silva e ka dhënë sinjalin e largimit. Ai ka postuar foto me fanellën e Fluminenses, por si ortak i klubit që e bëri të njohur para se të transferohej në Europë te Milani, ku qëndroi tre sezone dhe fitoi një titull kampion. Edhe pse në moshë të madhe, Tiago Silva nuk ka në plan të tërhiqet. Ai do të ishte i vlefshëm për shumë klube europiane dhe ndoshta te Milani e ëndërrojnë rikthimin e tij. Te PSG-ja, Silva përfitonte 14 milionë euro neto në sezon. Shiritin e kapitenit do t’ia lërë tashmë brazilianit tjetër, Markuinjos.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje