.png)
Tjetër provokim për Gjermaninë nga futbollisti Mesut Ozil, i cili është i lidhur fort me vendin e origjinës, Turqinë. Debati dhe polemikat mes tij dhe gjermanëve janë të njohura tashmë. Ato nisën verën e kaluar, pas fotografisë së lojtarit me presidentin e Turqisë, Rexhep Taip Erdogan. Sulmet ndaj mesfushorit u shtuan gjatë Botërorit të Rusisë dhe më pas Ozil i dha lamtumirën kombëtares gjermane, duke lëshuar një lumë akuzash. Disa drejtues të rëndësishëm, mes tyre edhe Kancelarja Angela Merkel, e mbështetën fillimisht dhe më pas ndryshuan qëndrim.
Mesut Ozil polemizoi fuqishëm me Federatën e Gjermanisë, duke e akuzuar se nuk e mbrojti nga sulmet e ndryshme. Fantazisti i akuzoi drejtuesit gjermanë edhe për racizëm dhe mungesë respekti ndaj tij. Edhe pse lojtari i Arsenalit ishte ndër protagonistët e fitimit të Kupës së Botës në 2014-ën në Brazil, raporti i tij me Gjermaninë ka ardhur duke u përkeqësuar. Në ndeshjet e fundit me fanellën e kombëtares, Ozil vërshëllehej shpesh nga tifozët e vet, çka solli më pas largimin e tij nga ekipi.
Sikur të mos mjaftonin të gjithë këto, për t’i hedhur “benzinë zjarrit” ka menduar vetë Ozil. Mbrëmjen e së enjtes, para ndeshjes së Europa League të Arsenalit me Valencian, Ozil ka tërhequr vëmendjen, siç bën të ditur “Sun”, me një varëse të re, ku mbante simbolet e Turqisë. Mesfushori e ka vlerësuar gjithmonë vendin e tij të origjinës. Në mars ai e ftoi presidentin Erdogan në dasmë, duke konfirmuar miqësinë me numrin 1 të Turqisë. Varësja që Ozil mbante para ndeshjes me Valencian ishte akti i radhës, që tregon se ai e ka harruar Gjermaninë dhe se është shumë më i lidhur me Turqinë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje