.png)
Gazeta Si- Ish-kryeministri italian, Silvio Berluskoni u shpall i pafajshëm nga gjykata italiane sa i takon akuzave ndaj tij për korruptimin e dëshmitarëve në një rast prostitucioni me të mitur. Një akuzë që rëndonte prej një dekade ndaj Kavalieros.
28 të pandehurit e tjerë, shumë prej tyre gra të reja të akuzuara për marrje ryshfeti, u liruan gjithashtu, përfshirë balerinën marokene Karima El Mahroug, e njohur me emrin e saj të skenës, ‘Ruby the Heartstealer’.
Ish-kryeministri Berluskoni akuzohej se kishte paguar 24 persona për të dhënë dëshmi të rreme në një gjyq të mëparshëm, ku ai u akuzua se kishte paguar për të kryer marrëdhënie seksuale me një kërcimtare 17-vjeçare marokene në një klub nate.
Prokurorët kishin kërkuar një dënim me gjashtë vjet burg për Berluskonin, partia e të cilit, Forza Italia, është një komponent kyç i koalicionit konservator të kryeministres Xhiorxhia Meloni. Berlusconi, 86 vjeç, i ka mohuar akuzat dhe tha se ishte viktimë e një komploti prej vitesh nga magjistratët për ta nxjerrë atë nga politika.
Skandali mbi festat private kontribuoi në rënien e Berlusconit si kryeministër në vitin 2011, duke shënuar fundin e qeverisë së tij të katërt.
I menjëhershëm ishte dhe reagimi i kryeministres Meloni, duke e cilësuar si një lajm të shkëlqyer.
“Lirimi i Silvio Berluskonit nga akuzat është një lajm i shkëlqyer që i jep fund një çështjeje të gjatë ligjore që pati gjithashtu pasoja të rëndësishme në jetën politike dhe institucionale italiane”, tha Meloni në një deklaratë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje