.png)
Parlamenti Europian mendon se masat kufizuese kundër përhapjes së pandemisë së koronavirusit në vendin tonë janë në përputhje me masat e ndërmarra nga vendet e BE-së dhe mbështet ndryshimet e fundit në Kodin Penal, ku u përfshinë ndëshkimet me burg për përhapje të sëmundjeve infektive.
Në një intervistë dhënë për “European Western Balkans”, raportueses për Shqipërinë në PE, Isabel Santos i kërkohet një mendim nëse i sheh të ashpra, apo proporcionale me situatën masat e ndërmarra nga Qeveria shqiptare, duke përfshirë këtu edhe ndalimin e lëvizjes për qytetarët.
“Masat kufizuese të ndërmarra në Shqipëri janë në të njëjtën linjë me ato që janë ndërmarrë nga shumë vende, edhe të BE-së, përfshirë vendin tim (Portugalinë). Isha në dijeni se në Kodin Penal nuk kishte asnjë paarashikim për përhapjen e sëmundjeve infektuese dhe ishte e nevojshme amendimi i tij”, deklaroi eurodeputetja Santos.
Megjithatë, përfaqësuesja social-demokrate në Parlamentin Europian e vlerëson si joproporcional dhe të ashpër propozimin fillestar të socialistëve, ku parashikohej ndëshkimi deri me 15 vite burg për përhapjen e sëmundjeve infektive.
“Pavarësisht joproporcionalitetit të propozimit fillestar, me ndihmën e aktorëve të shoqërisë civile dhe ligjvënësve u arrit një zgjidhje në përputhje me atë që është në fuqi në vendet e tjera. Në vendin tim aplikohet gjoba dhe burgu deri mbi tre vite”, thotë Santos.
Raportuesja për Shqipërinë në PE mendon se masat e ndërmarra nga Qeveria shqiptare kanë qenë në kohë dhe vlerëson vendimet për të dyfishuar ndihmën sociale dhe rialokimin e fondeve shtesë në zërin e mbrojtjes civile.
Sa u takon negociatave, Isabel Santos deklaron se hapja e tyre është një vendim i merituar dhe se Shqipëria kishte plotësuar kushtet. Megjithatë, para se negociatat të hapen zyrtarisht, Shqipëria duhet të përmbushë disa kushte shtesë, mes të cilave përmbylljen e reformës në drejtësi, ku përfshihet ngritja e Gjykatës Kushtetuese dhe të Gjykatës së Lartë dhe reforma zgjedhore.
Për reformën zgjedhore, Santos thotë se situata e shkaktuar nga pandemia e koronavirusit nuk ndihmon, por përshëndet vullnetin e palëve politike në Shqipëri për zgjatjen e mandatit të Këshillit Politik, organi ekstraligjor i ngritur në fillim të këtij viti me detyrë përmbylljen e reformës zgjedhore brenda datës 15 mars.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje