.png)
Parlamenti Europian ka votuar mbrëmjen e së enjtes rekomandimin drejtuar Këshillit, me anë të të cilit “zyrtarizon” kërkesën e institucioneve të Bashkimit Europian, që Shqipëria të plotësojë 15 kushtet para se të zhvillohet takimi i parë ndërqeveritar në kuadër të negociatave të anëtarësimit.
Rezoluta ishte nismë e partive të djathta europiane, por ajo mori edhe mbështetjen e një pjese të eurodeputetëve të majtë, duke u miratuar me 388 vota pro dhe 280 kundër. Teksti është i shkurtër, por i drejtpërdrejtë.
“(PE)…thekson se Shqipëria duhet të përmbushë 15 kushtet e vendosura nga Këshilli i Bashkimit Europian para konferencës së parë ndërqeveritare me vendet anëtare të BE”, thuhet aty.
Rekomandimi i Parlamentit Europian ka një ndryshim thelbësor në krahasim me propozimin e vjeshtës së vitit të kaluar të Këshillit, ku para hapjes formale të negociatave kërkohej plotësimi i 3 kushteve që lidheshin me sistemin e drejtësisë dhe reformën zgjedhore dhe si afat përcaktohej gjysma e parë e këtij viti.
“Para se të mbahet konferenca e parë ndërqeveritare, jo më larg se në gjysmën e parë të vitit 2020, në varësi të përparimit të shënuar, Shqipëria duhet të sigurojë funksionimin e Gjykatës Kushtetuese dhe Gjykatës së Lartë, si dhe të shënojë përparim të mëtejshëm në reformën zgjedhore, në përputhje me rekomandimet e OSBE/ODIHR-it”, thuhej në dokumentin fillestar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje