.png)
Ka zgjatur vetëm dy muaj aventura shqiptare e Françesko Morieros dhe Fabicio Mikolit, të cilët erdhën me bujë te Dinamo. Fillimisht, ishte trajneri Moriero që me një postim në faqen e tij zyrtare bënte me dije se kishte dhënë dorëheqjen nga stoli i bluve bashkë me stafin e tij, por pa dhënë asnjë arsye.
Më pas, presidenti i Dinamos, Marko Pontreli, bëri të ditur nëpërmjet faqes zyrtare të klubit kryeqytetas se është koha për një trajner shqiptar. Mesazhi i tij se “Dinamo është më e madhe se çdo emër i përveçëm” lë të nënkuptohet se diçka nuk ka shkuar në marrëdhëniet mes stafit italian të bluve dhe drejtuesve e skuadrës.
Burime të Gazeta Si pranë Dinamos pohojnë se trajnerët e rinj nuk krijuan dot një lidhje me grupin e futbollistëve dhe se këta të fundit kishin vështirësi në komunikim me ta.
Moriero dhe Mikoli e drejtuan Dinamon në dy ndeshje, në shtëpi ndaj Erzenit, ku blutë humbën 1-2 dhe në transfertë me Orikun, ku fituan 0-1. Dinamo mban vendin e dytë në Grupin A dhe tashmë duhet të gjejë trajnerin e tretë për këtë sezon, pasi para Morieros u largua një tjetër italian, Fabricio Kamarata, trajneri aktual i Apolonisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje