.png)
Kryesia e Partisë Demokratike do të mblidhet pasditen e së hënës për të diskutuar në lidhje me zhvillimet e fundit brenda opozitës.
Mbledhja është thirrur nga Sekretari i Përgjithshëm i PD-së, Gazment Bardhi që u ka dërguar një mesazh anëtarëve të këtij forumi.
“Diskutime dhe vendimmarje mbi situatën politike, si dhe marrjen e masave për të mbrojtur interesin e Partisë Demokratike dhe funksionimin demokratik të organeve të saj”, thuhet në mesazhin e Bardhit.
Përplasja mes Sali Berishës dhe Lulzim Bashës brenda PD-së është përshkallëzuar që pas vendimit të ish-kreut të kësaj partie për të thirrur më 11 dhjetor Kuvendin e jashtëzakonshëm kombëtar. Për këtë qëllim, Berisha thotë se kanë firmosur 4200 delegatë të Kuvendit.
Identitetet e firmëtarëve, sipas Berishës do të zbulohen gjatë Kuvendit Kombëtar, ndërsa drejtuesit e PD-së mund të verifikojnë origjinalitetin e këtyre firmave. Por, Gazment Bardhi ka hedhur dyshime se firmat e nevojshme për të thirrur Kuvendin nuk janë mbledhur. Ai thotë se për këtë arsye ato po mbahen të kyçura në zyrën e Edi Palokës, që është kryetar i Këshillit Kombëtar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje