.png)
Gazeta Si – Parlamenti i Perusë rrëzoi presidentin Pedro Castillo me 101 vota pro, gjashtë kundër dhe dhjetë abstenime.
Pas shkarkimit të tij, Parlamenti zgjodhi në vend të tij nënpresidenten Dina Boluarte, e cila u betua si kryetarja e re e shtetit.
Më parë Castillo, i arrestuar nga policia antikorrupsion, kishte urdhëruar shpërndarjen e Parlamentit, pak para se të debatohej një mocion për shkarkimin e tij. Akuza është rebelim ndaj shtetit dhe organizatë kriminale.
Ish-presidenti ishte parë të largohej nga selia e qeverisë, së bashku me familjen e tij, në procesverbalin në të cilin Kuvendi miratonte mocionin e mosbesimit ndaj tij.
Castillo, i cili kishte shkuar në zyrën e prefekturës së Limës për të kërkuar garanci personale, u arrestua “në flagrancë”, për shpërndarjen e Kongresit, në kundërshtim me Kartën Kushtetuese.
Kongresi u mblodh pasi vetë presidenti urdhëroi shpërndarjen e asamblesë, në atë që është quajtur “vetë-grusht shteti”.
Parlamenti votoi për shkarkimin me 101 vota pro, krahasuar me 87 që nevojiteshin që rrëzimi të ishte efektiv. “Në ndjekjen e detyrave të saj të përcaktuara me ligj, Policia Kombëtare e Perusë ka arrestuar ish-presidentin Pedro Castillo”, thuhet në një deklaratë.
Situata politike erdhi në krye kur Castillo, në përpjekje për të penguar Parlamentin të votonte për shkarkimin për herë të tretë, urdhëroi shpërndarjen e asamblesë legjislative.
Megjithatë, as Gjykata Kushtetuese dhe as forcat e armatosura nuk e kanë ndjekur presidentin në këtë rrugë.
Castillo u dënua më pas me dhjetë ditë burg parandalues me supozimin e krimeve të ndryshme, përfshirë rebelimin.
Në një deklaratë zyrtare, Prokuroria bëri me dije se për veprimin e saj, akuzat ndaj Castillos janë për kryengritje, prishje të rendit publik dhe tejkalim pushteti.
Presidentja e sapozgjedhur Dina Boluarte, ka bërë thirrje “për unitetin e të gjithë peruanëve” dhe për një “armëpushim politik” me qëllim “krijimin e një qeverie të unitetit kombëtar”.
Në një fjalim që zgjati pak më shumë se dhjetë minuta dhe pas marrjes së brezit presidencial nga Presidenti i Parlamentit, Josè Ëilliam, presidentja e parë femër e Perusë nënvizoi se “unë marr detyrën e vetëdijshme për përgjegjësinë e madhe që bie mbi mua”.
Me “bindjen e thellë”, tha ajo, se “është thelbësore të rifillohet rruga e rritjes ekonomike dhe përfshirjes sociale dhe reforma politike që i nevojitet vendit”.
“Masa ime e parë, – vazhdoi ajo, – do të jetë lufta kundër korrupsionit në të gjitha format e tij”, sepse “ky kancer duhet të zhduket”.
Boluarte më pas falënderoi “forcat e armatosura dhe policinë kombëtare, të cilët janë dëshmuar se janë një shtyllë e demokracisë dhe u kërkoj atyre të kenë besim në procesin që po inaugurojmë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje