.png)
Armand Duka, presidenti i Federatës Shqiptare të Futbollit dhe anëtar i Komitetit Ekzekutiv të UEFA-s, ndodhet aktualisht në Lisbonë, ku do të ndjekë finalet e mëdha të kompeticioneve europiane, Ligës së Kampionëve dhe Ligës së Europës. Ai ka dhënë një intervistë për “Sky Sport”, ku ka folur mes të tjerash për objektivat e Kombëtares kuqezi, për futbollistët shqiptarë që luajnë në Itali dhe suksesin e Igli Tares te Lacio.
Si e shikoni finalen e të dielës, për cilën skuadër bëni tifozllëk?
Në fakt, nuk bëj tifozllëk për asnjë nga dy skuadrat finaliste të së dielës, pasi jam një tifoz i Milanit. Milani nuk është këtu, por e shikoj finalen si një ndeshje mes dy klubesh të mëdha që e kanë merituar të vijnë deri në finale. Jam i lumtur që në fund ne u rikthyem te futbolli dhe kemi arritur t’i mbyllim të gjitha aktivitetet. UEFA është e vetmja konfederatë në botë që ka arritur t’i mbyllë të gjitha aktivitetet, edhe për këtë jam i lumtur, për këtë organizim.
Kombëtarja shqiptare drejtohet nga një trajner italian, Reja. Ka një lidhje miqësore, gati vëllazërore nga ana e Shqipërisë, ku pas De Biazit erdhi Panuçi dhe tani Reja…
Ka kohë që kemi italianë si trajnerë. Shumë futbollistë shqiptarë luajnë në Itali edhe e njohin më mirë edhe mentalitetin. Jemi mësuar. Me De Biazin arritëm kualifikimin në Euro 2016, që për ne shqiptarët ishte si të arrinim yjet. Mëkat që ishte kjo periudha e virusit, e pandemisë COVID-19, na e ka vështirësuar aktivitetin tonë, por kemi të njëjtin objektiv me Rejan, që të kualifikohemi në Euro 2024. Shpresojmë që ta arrijmë me një italian tjetër në stol.
Sa i përket merkatos, ka më shumë futbollistë shqiptarë në Itali, si Berisha, Strakosha, Gjimshiti, gjithashtu edhe Tare si drejtor sportiv…
Tare është kthyer në pikë referimi, i cili me buxhet minimal ka arritur suksese me ekipin e Lacios në vitet e fundit. Sigurisht që ka ndihmuar futbollistët shqiptarë të afrohen te Lacio apo dhe në skuadrat e tjera italiane. Kemi shumë talente të rinj që luajnë në Itali, siç është rasti i Kumbullës, por kemi edhe të tjerë që janë të perspektivës. Kështu që shpresoj të kemi më shumë futbollistë në Serinë A.
Sa i përket finales së të dielës, cili është parashikimi juaj?
Sa i përket finales së të dielës të Ligës së Kampionëve është e vështirë të parashikosh, mendoj se Bajer Mynih është një skuadër më e konsoliduar, por është një finale dhe gjithçka mund të ndodhë në një ndeshje të vetme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje