.png)
Situatë e vështirë për mesfushorin e Kombëtares, Ledian Memushaj. Vlonjati që luan për Peskarën në Serinë B është lënë jashtë skuadrës për ndeshjen me Kievon në kampionat. Arsyeja? Memushaj ka përplasje me trajnerin Luçiano Xauri, i cili në javët e fundit e ka zëvendësuar shpesh mesfushorin dhe ky i fundit ka reaguar, duke e shprehur hapur pakënaqësinë.
Futbollisti 33-vjeçar ka qenë një nga titullarët më të rëndësishëm të Peskarës, ku ka mbajtur edhe shiritin e kapitenit. Ai ka lënë gjurmë edhe këtë sezon, me 2 gola dhe 7 asiste, por kjo nuk mjafton për trajnerin Xauri. Memushaj, ekzekutues i të gjitha goditjeve standarde për skuadrën e tij, ndoshta edhe për shkak të rënies fizike në pjesën e dytë, ka parë shpesh numrin e tij në tabelën e zëvendësimit dhe nuk e ka pritur aspak mirë këtë gjë. Ai, sipas shtypit italian, ka debatuar me trajnerin dhe tani duket se është kthyer në një çështje personale mes tyre.
Për pasojë, në ndeshjen e sotme me Kievon, Memushaj nuk figuron as në stolin e rezervave. Një ndëshkim ky nga trajneri Xauri për të lënë të kuptohet se skuadra është para individit. Peskara ka 25 pikë pas 18 javësh kampionat dhe është pranë zonës së “play-off”-it. Mesfushori kuqezi ka qenë gjithmonë i rëndësishëm për këtë skuadër, por duket se gradualisht po vjen momenti që të kufizohet edhe minutazhi i tij. Mosha bën të vetën. Edhe në Kombëtare aktivizimi i vlonjatit vjen duke u zvogëluar dhe tërheqja mund të jetë shumë pranë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje