.png)
Gazeta Si – Presidenti rus Vladimir Putin nuk do të mbajë konferencën tradicionale për shtyp të fundvitit. Njoftimi u bë nga zëdhënësi i Kremlinit, Dmitry Peskov.
Bëhet fjalë për një vendim me pak precedentë për Putinin, i cili e kishte shndërruar konferencën për shtyp të fundvitit në një ngjarje shumëorëshe me qindra gazetarë të akredituar.
Putini nuk e mbajti konferencën për shtyp midis 2009 dhe 2011 – kur, megjithatë, ai ishte “vetëm” kryeministër rus: besniku i tij, Dmitry Medvedev u ul në karrigen e presidentit – dhe e kishte anuluar atë vetëm një herë, në të kaluarën, në 2005.
Peskov u përpoq të minimizonte vendimin e presidentit, duke shpjeguar se Putin tashmë flet “rregullisht” me shtypin.
Anulimi i konferencës për shtyp vjen në një kohë kur mbështetja ruse për luftën në Ukrainë po pakësohet – megjithëse mbështetja për presidentin mbetet ende shumë e lartë.
Konferenca e shtypit e fundvitit të kaluar u zhvillua më 23 dhjetor, pothuajse saktësisht dy muaj përpara fillimit të pushtimit, pasi Kremlini po mohonte akuzat e Ukrainës dhe të SHBA-së se dhjetëra mijëra trupa ruse që grumbulloheshin pranë kufirit parashikonin nisjen e pushtimit.
Mediat perëndimore shkruajnë se anulimi i konferencë së përvitshme tregon se presidenti rus ndodhet në vështirësi përpara opinionit publik pas humbjeve që i ka shkaktuar ushtrisë dhe ekonomisë së Rusisë, sulmi 10-mujor në Ukrainë.
Ekspertët thonë se Putin mund të ketë dashur të shmangë ballafaqimin me pyetjet e gazetarëve të pavarur për luftën në Ukrainë dhe përgjigjet delikate që mund të ndikojnë negativisht për pushtetin e tij.
Në konferencën vjetore është traditë pjesëmarrja e mbi 1 mijë gazetarëve nga e gjithë bota. Mbajtja e saj është e detyrueshme me ligj, pasi konsiderohet si fjalim mbi gjendjen e federatës si në çdo vend të botës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje