.png)
Numrat nuk gënjejnë. Në futboll shpesh thonë shumë, si në këtë rast në Spanjë, në një nisje rekord për dy klubet baske, Atletiko Bilbao dhe Real Sociedad, që mbajnë vendet e para. Atletiko Bilbao ishte në krye deri pak ditë më parë, por u kalua nga Real Madrid dhe pas fitores së fundit të Real Sociedadit ndaj Alaveshit ka zbritur në vend të 4-t. Tashmë është Sociedadi në vend të dytë, pas Real Madrid.
Kështu, numrat japin shumë shpresë për dy skuadrat baske. Atletiko Bilbao ka mbrojtjen më të mirë në kampionat, vetëm 2 gola të pësuar, që do të thotë njëkohësisht edhe një ndër mbrojtjet më të mira të kampionateve kryesore në Europë (pas Interit me një gol të pësuar). Një e dhënë mjaft interesante, sepse pas 6 javësh kampionat, prej gati 40 vjetësh Bilbao nuk pësonte kaq pak gola. Që prej vitit 1993, Atletiko Bilbao nuk gjendej në vendet e kreut. Që kur drejtimin e ka marrë 44-vjeçari Gaizka Garitano, më 4 dhjetor 2018 (30 ndeshje kampionat), Atletiko është mbrojtja e dytë më e mirë në la Liga (24 gola të pësuar) dhe është skuadra e 4-t për pikë të grumbulluara, pas Barcelonës Realit dhe Valencias. Në “San Mames”-in e ri nuk humb prej 17 ndeshjesh, që nga 5 tetori 2018, në derbin me Real Sociedad. Nuk ndodhte kjo gjë prej 29 vitesh.
Është pa diskutim meritë e trajnerit Garitano, i cili është i biri i Angel, për një kohë të gjatë zëvendësi i Mané në stolin e Bilbaos në sezonet 2005-07, dhe nipi i Ander, ish-mesfushor i këtij ekipi në vitet 1988-1996. Gaizka është rritur te moshat e Lezamas dhe më pas ka luajtur me Eibarin dhe Real Sociedadin. Si trajner e ka nisur me Eibarin, për të vazhduar me Valadolidin dhe Deportivo La Korunjën, për t’u kthyer në shtëpi. Në verë nuk u shqetësua aspak që klubi nuk bëri asnjë blerje, madje lejoi largimin e Iturraspe për tek Espanjoli dhe Merino te Leganes.
Trajneri i Atletiko Bilbaos ka fiksuar skemën 4-2-3-1, një rreshtim shumë i kujdesshëm, me mbulimin zonal, e udhëhequr nga lojtari i kombëtares spanjolle Injigo Martinez, dhe nga dy anësorët Juri dhe Kapa (3 asiste) në një moment të jashtëzakonshëm. Rolin e liderit e ka marrë 33-vjeçari Raul Garsia, ish-lojtar i Atletiko Madrid, autor i 4 golave këtë sezon. Në majë të sulmit është i riu “veteran” Injaki Uilliams, lojtari i parë me ngjyrë në historinë e klubit. Ka lindur në Bilbao nga prindër ganezë dhe të gjithë e thërrasin “pannolino”, sepse është shumë i lidhur me familjen. Është edhe Iker Muniain, 26-vjeçari me 10 vjet përvojë në La Liga.
Po Real Sociedadi? Është ekipi më i ri në moshë në La Liga, me një moshë mesatare prej 25 vjetësh. Mban vendin e dytë dhe deri tani ka humbur vetëm një ndeshje, derbin me Atletiko Bilbaon, më pas ka mundur Atletiko Madridin, Espanjolin dhe Barcelonën. Një fillim i tillë mbresëlënës nuk ndodhte që prej sezonit 2002-03, me francezin Denua në stol dhe Karpin, Nihat dhe Kovaçeviç në fushë. Atë vit Real Sociedad zuri vendin e dytë në kampionat. Tani “timonin” në San Sebastian e ka Imanol Alguakil, 48 vjeç, 8 vjet mbrojtës krahu me Sociedadin, pastaj me Villarrealin. Karrierën e trajnerit e ka nisur tek akademia e klubit, pastaj te skuadra B dhe që prej dhjetorit të shkuar në krye të skuadrës së parë.
Këtë sezon Sociedadi u ka besuar të rinjve. Ka marrë nga Borusia Dortmund Aleksander Isak, një sulmues 20-vjeçar, 14 gola sezonin e shkuar në Holandë, ku ishte i huazuar. Ai luan në krah të Oiarzabal, 22-vjeçarit që bën pjesë në kombëtaren spanjolle, kampion me U-21-shin në qershor. Edhe ai ka shënuar 14 gola sezonin 2018-19. Pastaj janë edhe 20-vjeçari norvegjez Odegaard, i huazuar nga Real Madrid në Holandë, te Herenven dhe Vitese, dhe ish-lojtari Mançester Junajtid, Adnan Januzaj. Pranë “chicos” (çunakëve), trajneri Imanol ka vendosur disa ekspertë si ish-lojtarin e Arsenalit Naço Monreal, sulmuesin brazilian Uillian Jose (27 vjeç), portierin Moja (35 vjeç) dhe kapitenin Iarramendi. Një miks që po funksionon për bukuri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje