.png)
Daniele Rugani ka rezultuar pozitiv me Koronavirus, duke bërë që Juventusi dhe Interi të përfundojnë në karantinë. Është lojtari i parë i Serisë A i infektuar nga virusi që po pushton gjithë botën, pas disa rasteve të evidentuara në kategoritë inferiore të futbollit italian. Lajmi është bërë i ditur zyrtarisht nga vetë lojtari, por edhe nga klubi i Juventusit. “Futbollisti Daniele Rugani ka rezultuar pozitiv me Koronavirus. Juventusi po ndjek të gjitha procedurat për izolimin sipas rregullave, duke përfshirë të gjithë personat që kanë pasur kontakte me të”, – shkruhet në komunikatën zyrtare të klubit bardhezi.
Janë lajmëruar të gjitha skuadrat, me të cilat Juventusi ka luajtur javët e fundit për të ndjekur procedurat përkatëse. Rugani ka luajtur titullar me Breshian më 16 shkurt dhe me Spalin e Etrit Berishës më 22 shkurt, më pas ka qëndruar në stol ndaj Lionit në Champions më 26 shkurt dhe ndaj Interit më 8 mars. Lajmi i Ruganit me siguri do të reflektohet në zgjedhjen e UEFA-s në prag të ndeshjes së kthimit mes Juventusit dhe Lionit në Champions dhe ndeshjes së Interit me Getafen në Ligën e Europës.
“E keni lexuar tashmë lajmin dhe për këtë dua t’i qetësoj të gjithë ata që janë të shqetësuar për mua. Jam mirë. I ftoj të gjithë të respektojnë rregullat, sepse ky virus nuk bën dallime. Ta bëjmë për veten tonë, për të gjithë të dashurit tanë dhe për këdo që na rrethon”, – shkruan Rugani në Tuiter.
Një reagim zyrtar ka pasur edhe Interi, që bën të ditur pezullimin e çdo aktiviteti deri në një vendim të dytë. “FC Internazionale Milano bën me dije se pas njoftimit të Juventusit në lidhje me infektimin e futbollistit Daniele Rugani nga COVID-19, pezullon çdo lloj aktiviteti deri në një vendim të dytë. Klubi është aktiv për të ndjekur të gjitha procedurat e nevojshme”, – shkruhet në njoftimin e klubit zikaltër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje