.png)
Gazeta Si – Rusia dhe Shqipëria kanë shkëmbyer akuza dhe replika me njëri-tjetrin në lidhje me goditjen e ndërtesës së Konsullatës shqiptare në Kharkiv në Ukrainë.
Gjatë ditës, ishte Rusia ajo që mohoi prerazi akuzat e Ministrisë së Jashtme shqiptare disa ditë më parë se forcat ruse dyshohet se kanë sulmuar ndërtesën e konsullatës së nderit të vendit në Kharkiv si rezultat i sulmeve me raketa.
“Ne i hedhim poshtë me vendosmëri akuza të tilla, – tha zëdhënësja e Ministrisë së Jashmte, Maria Zakharova në një konferencë për shtyp. – Që nga fillimi i operacionit special në Ukrainë, ne kemi deklaruar mjaft qartë se ushtria ruse nuk sulmon infrastrukturën civile”.
Zakharova theksoi se udhëheqja ukrainase po përdor metoda terroriste: “Ata vendosin pozicione luftarake dhe armë në zonat e banuara, nga ku bombardojnë lagjet urbane. Ata përdorin civilët si mburojë njerëzore dhe provokojnë qëllimisht viktima”.
Sipas Zakharovës, “ushtria ukrainase pengon evakuimin e popullatës civile përmes korridoreve humanitare që Rusia ka krijuar. Janë këto veprime dhe taktika çnjerëzore që duhet të jenë fokusi i diskutimit”.
1/1. #Albania condemns #Russia's use of #fakenews to deny the bombardment of the 🇦🇱 Honorary Consulate in #Kharkiv.
— Albanian MEFA 🇦🇱 (@AlbanianDiplo) March 17, 2022
👉The images of demolition speak for themselves. pic.twitter.com/GpSQaEn9TT
Zakharova kërkon “vlerësime të paanshme dhe informacion të vërtetë për publikun e gjerë”. Por më vonë, Ministria e Jashtme e Shqipërisë, ka reaguar ndaj mohimit të sulmit.
Përmes një njoftimi zyrtar, ministria e konsideron “lajm të rremë” deklaratën e Ministrisë së Jashtme të Rusisë.
Në një reagim në Twitter, MEPJ thotë se pamjet e shembjes flasin vetë dhe ky shkatërrim i ambienteve dhe dokumenteve në arkiva është shkelje e Konventës së Vjenës për Marrëdhëniet Konsullore.
“Shqipëria dënon përdorimin e lajmeve të rreme nga Rusia për të mohuar bombardimin e Konsullatës së Nderit të Shqipërisë në Kharkiv. Pamjet e shembjes flasin vetë. Ky shkatërrim i ambienteve si dhe i dokumenteve në arkiva është një shkelje flagrante e nenit 61, kreu III i Konventës së Vjenës për Marrëdhëniet Konsullore. Dezinformimi dhe lajmet e rreme për këtë sulm janë të papranueshme”, thuhet në njoftimin Ministrisë së Jashtme.
Në 7 mars, Ministria për Evropën dhe Punët e Jashtme ka bërë me dije se godina e Konsullatës shqiptare në Karkiv është bombarduar nga forcat ruse.
Institucioni i drejtuar nga Olta Xhaçka e dënoi sulmin ndaj godinës së konsullit shqiptar të nderit në Ukrainë.
Bashkëngjitur njoftimit, institucioni ynë i diplomacisë shpërndau edhe fotot e godinës së shkatërruar në Ukrainë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje