.png)
Në një orë e 15 minuta, kryeministri Edi Rama zhvilloi një bashkëbisedim ndryshe të dielën.
Kësaj here jo me qytetarë, por me ata që do t’i përfaqësojnë për herë të parë në Kuvendin e pas 25 prillit; kandidatët e rinj për deputet që fituan përmes procesit me tre etapa; “deputeti që duam”.
Rama tha fillimisht se në këtë proces kanë aplikuar 1581 kandidatë, por siguroi paralelisht se boshti i grupit të ardhshëm parlamentar do të jetë ai aktuali.
“Grupi im parlamentar ka shumë profile të përshtatshme për çdo rol dhe gjatë këtyre viteve ka krijuar një bagazh eksperience të vyer që assesi nuk mund të neglizhohet.
Është një grup që ka mbajtur ngarkesa të mëdha, momente të caktuara, krejt të pazakonshme për vetë dinamikën e jashtëzakonshme të jetës parlamentare, ku momentet e rënda të tensionit kanë qenë të shpeshta dhe të gjata.
Grupi ka qenë vijimisht solid dhe mbështetës për reformat, për vendimmarrjet e vështira dhe për çuarjen përpara të punës përpara.
Ky grup do të jetë boshti i skuadrës sonë kombëtare të 25 prillit…”, tha Rama.
Kryeministri u kujdes të nënvizonte gjithashtu se në PS nuk ka vend për kasta të pandryshueshme drejtuese, as për piedestale statujash që nuk lëvizin nga pozicionet.
“Na duhen deputetë e deputete që ambicien të kenë qëndrimin sa më pranë zgjedhësve. Zgjidhjen e halleve e problemeve të njerëzve në çdo komunitet, pjesëmarrjen sa më të frytshme në parlament, por shumë e rëndësishme kontributin sa më pozitiv në frymën e skuadrës”, tha Rama, një ambicie që e shpalosën një e nga një deri në formë recitimi disa nga kandidatët e rinj për deputet, që do të jenë pjesë e listës së PS.
Kandidatët e prezantuar u shfaqën të arsimuar, të artikuluar, por riosh për politikën.
Disa prej tyre ngecën që me pyetjen e parë thumbuese që kryeministri Rama u drejtoi.
“Kur unë kam hyrë në PS, kam hyrë sepse me një anë e shihja PS si forcën që ishte e vetmja që mund ta bënte në vijimësi vendin… Mendoja se PS kishte defekte për të ndrequr. Më thuaj defektin më të madh të PS që ti do të dojë të ndreqje.”, iu drejtua kryeministri kandidates nga Korça.
Ajo u skuq dhe pa përgjigje.
“Se nëse PS është kaq e bukur dhe e mirë, ça nevoje kemi për ty?!”, ndërhyri sërish Rama
“Do doja që ashtu si unë të përfshiheshin edhe më shumë njerëz të thjesht të PS”, tha kandidatja për deputete.
“Të thjeshtë janë njerëzit në PS. Taulant Balla nuk vjen nga njerëz të veçantë në status. Vjen nga babai mësues e nëna infermiere. Edhe Erioni po ashtu. Detyra për ty në këtë rrugë që sapo ke nisur është që herën tjetër dhe në vijimësi dhe kur të flasësh me njerëzit, të thuash edhe çfarë janë gjërat që duhen ndrequr. Ti dukesh e kënaqur, unë jam i pakënaqur me PS, me qeverinë, me veten time. Nuk është kaq e lehtë kjo punë…”, replikoi Rama.
Të njëjtën pyetje kryeministri ia drejtoi edhe kandidatëve të tjerë të rinj, kryesisht femra. Dhe vjen përgjigja e njërës prej tyre, Albana Hana.
“Unë jam vajza e një prokurori të nderuar që s’jeton më, është ndarë nga jeta. Emri i atij është emri im. Do mundohem të çoj sa më lartë emrin e tij, ” – u prezantua me drejtpërdrejt ajo pas një ndërhyrje të Ramës.
“Çfarë sheh një defekt që kam unë. Ke 5 sekonda kohë për ta thënë”, iu drejtua Rama.
Pas një hezitimi dhe një reagimi të atypëratyshëm, ajo iu përgjigj: “Jeni pak arrogant”.
“E the butë. Mbase jam. Unë mendoj që ajo që mua më etiketohet arrogancë, është drejtpërdrejtësia. Bindjet nuk janë gjithmonë të drejta në një debat. Unë preferoj t’i mbroj bindjet e mia. Nëse jam gabim, unë tërhiqem dhe kërkoj falje”, – reagoi Rama.
Një tjetër kandidate për deputete ajo e qarkut Kukës tërhoqi vëmendjen e Ramës me “armën” e këtij të fundit.
“Siç e keni thënë ju që jeni lypësi më i gjatë, unë do jem një nga ato lypëset më të forta për të arritur synimet.
Unë kam një jetë shumë të mirë, i kam të gjitha mundësitë mirëpo kam ambicie, dua që Kukësi të zhvillohet…”, tha ajo.
Ajo që kërkoi më shumë Rama gjatë bashkëbisedimit që u kthye si në “provim” për kandidatët riosh ishte sinqeriteti dhe arsyet e vërteta se pse i ishin futur politikes.
I tillë ishte edhe rasti i një tjetër kandidateje që synon të përfaqësoje Patosin e cila gjatë prezantimit të saj u duk sikur po lexonte një fjalim; “Te nderuar zonja e zotërinj”, iu drejtua ajo një ambienti krejt të vogël ku në fakt ishin vetëm Rama dhe dy tre kandidate.
“Zonja e zotërinj nuk ka në këtë komunikim brenda nesh”, replikoi ai.
Më të qartë në garën e tyre ishte një djalë që përfaqësonte kategorinë e jetimeve, apo një akademike nga qyteti i Shkodrës e cila kërkonte që ky qark të ishte më pak i politizuar.
“Është zona me tensionin më të lartë të tifozllëkut politik. Kjo e cenon ndonjëherë edhe interesin e drejtpërdrejtë të individit. Kur ti merr në punë një person apo kur ti shkon tek një mjek apo mësues nuk nisesh me cilën parti janë por kush bën punën më të mirë… Shkodra ka paguar shumë gjatë me koston e zgjedhjes që ka bërë”, reagoi Rama, duke thumbur PD në këtë rast.
Në listën e kandidatëve do të jetë edhe Ish-shefi i shtabit të Përgjithshëm Bardhyl Kollçaku i prezantuar edhe ai të dielën si një nga kandidatët për deputetë për zgjedhjet e 25 prillit.
Kollçaku foli gjatë për të kaluarën e tij. Ai u prezantua zyrtarisht vetëm pak ditë pasi ka fituar gjyqin me presidentin Ilir Meta dhe ministrinë e Mbrojtjes lidhur me padinë që bëri për shkarkimin e tij nga detyra para kohe.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje