.png)
Gazeta Si – Presidenti amerikan Joe Biden urdhëroi dërgimin e tre mijë trupave amerikane në Evropën Lindore. Përveç kësaj, trupat e tjera tashmë të pranishme në Kontinentin e Vjetër do të zhvendosen në Gjermani dhe Poloni.
Zëdhënësi i Pentagonit, Admirali John Kirby, saktësoi se asnjë ushtri nuk do të vendoset në Ukrainë, por këto manovra janë përgjigja e parë e SHBA-ve ndaj kërcënimeve ruse në terren.
“Këto nuk janë ndryshime strukturore, por ato u përgjigjen nevojave kontingjente. Ne duam të mbrojmë interesat tona në rajon dhe ato të aleatëve tanë”, shtoi Kirby.
Menjëherë pas vendimit, Moska reagoi me një mesazh zemërimi: “Dërgimi i trupave amerikane është një hap shkatërrues”.
Biden kishte thirrur një lloj këshilli lufte në Camp David, ku shqyrtoi zhvillimet në krizën e Ukrainës me Këshilltarin e Sigurisë Kombëtare, Jake Sullivan, Sekretarin e Mbrojtjes, Lloyd Austin dhe Shefin e Shtabit, Mark Milley. Në atë takim, Biden u bind se Shtetet e Bashkuara duhet të kishin bërë më shumë për të frenuar presionin nga Vladimir Putin.
Më 24 janarin e kaluar, Biden paralajmëroi liderët evropianë: Shtetet e Bashkuara vunë në gatishmëri 8,500 burra dhe gra me uniformë, të gatshëm për të forcuar postet mbrojtëse të NATO-s.
Në fillim, megjithatë, dukej se ndërhyrja e SHBA-së do të bëhej vetëm pas një cenimi të mundshëm të ushtrisë ruse.
Por ditët e fundit, siç u zbulua nga Jim Sciutto i CNN, gjeneralët do ta kishin bërë presidentin të ndryshonte mendje: një sinjal duhej t’i dërgohej menjëherë Putinit. Përafërsisht, një e treta e forcave të mobilizuara në bazat amerikane do të largohen menjëherë.
Sipas Uashingtonit, Moska po forcon vendosjen e saj në kufi, veçanërisht në Bjellorusi. Departamenti i Shtetit, pret që Putini të përqendrojë deri në 30,000 trupa në veri të Ukrainës. Dhe sekretari i NATO-s, Jens Stoltenberg shtoi se rusët po lëvizin “tanke, artileri të rëndë, avionë dhe helikopterë”.
Tani rruga drejt diplomacisë bëhet edhe më e ngushtë. Ambasadorët e Rusisë dhe Shteteve të Bashkuara u përplasën ashpër në Këshillin e Sigurimit të OKB-së, ndërsa Sekretari i Shtetit, Antony Blinken, po përpiqet të mbajë gjallë dialogun me ministrin e Jashtëm Sergei Lavrov.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje