.png)
Allen Weisselberg, zyrtari kryesor financiar i Organizatës Trump dhe një bashkëpunëtor i ngushtë i ish-presidentit, i cili akuzohet në hetimin për krimet tatimore që po kryhen nga Prokurori i Qarkut në Manhattan, Cyrus Vance, u dorëzua mëngjesin të enjtes.
Akuzat nuk janë zbuluar ende – hetuesit do t’i zyrtarizojnë ato më vonë gjatë ditës duke paraqitur aktakuzën kundër Organizatës Trump dhe menaxherit të saj – por ata duhet të përqendrohen në përfitimet e marra nga Weisselberg dhe familja e tij pa u deklaruar te autoritetet tatimore: mes të tjerash, bëhet fjalë për shkolla private, për të paktën një nip të tij, apartamente falas dhe makina me qira.
Hetimi lidhet me një të dytë të kryer nga Prokurorja e Përgjithshme e Shtetit të Nju Jorkut, Letitia James, e cila po heton nëse Organizata Trump ka paguar në të vërtetë taksa për ato që duhej të konsideroheshin të ardhura të tatueshme në të gjitha aspektet.
Objektivi i dy hetimeve, është të nxjerrin në dritë krimet e mundshme financiare të kryera nga kompania, të cilat mund të kenë manipuluar vlerën e disa pronave për të marrë hua dhe lehtësime tatimore.
Weisselberg, “njeriu që njeh çdo monedhë që del nga Trump Tower”, siç e quajti ish-menaxheri i fushatës zgjedhore, Corey Lewandoski, nuk donte kurrë të bashkëpunonte.
Vetë Trump, tha se ishte 100% i sigurt se nuk do ta tradhtonte. Sidoqoftë, shënojnë gazetat amerikane, ka ende kohë: nëse ai e pranon fajin, ai mund t’i shkaktojë dëme serioze ish-presidentit.
I shoqëruar nga avokati i tij, 73-vjeçari Weisselberg – i cili filloi të punojë për babanë e Trumpit, Fred, gati 50 vjet më parë – arriti në zyrën e Prokurorit të Shtetit në orën 06.20 të mëngjesit dhe pritet të raportojë në gjykatë pasdite me përfaqësues të kompanisë imobilare të familjes Trump. Nga ana tjetër, ish-presidenti nuk duhet të paditet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje