.png)
Shtetet e Bashkuara njoftuan një paketë sanksionesh të reja kundër Rusisë dhe ndihmë të mëtejshme për refugjatët ukrainas, ndërsa presidenti Joe Biden synon që të bëjë bashkë udhëheqësit e disa prej demokracive më të fuqishme në botë për të rritur përpjekjet e tyre për të ndihmuar Ukrainën në një seri takimesh të nivelit të lartë.
SHBA tha se do të vendosë sanksione shtesë për më shumë se 400 rusë dhe entitete ruse, duke përfshirë Dumën dhe më shumë se 300 anëtarë të saj, së bashku me më shumë se 40 kompani të mbrojtjes, tha një zyrtar i lartë i administratës. Uashingtoni planifikon të ndërmarrë hapa shtesë për të parandaluar Rusinë nga përpjekjet për të mbështetur ekonominë e saj.
Shtëpia e Bardhë gjithashtu njoftoi se do të lejojë deri në 100,000 ukrainas të hyjnë në SHBA, me fokus tek ata që janë më të cenuarit. Administrata është gjithashtu e gatshme të ofrojë më shumë se 1 miliard dollarë fonde shtesë për ndihmën humanitare dhe 11 miliardë dollarë gjatë pesë viteve të ardhshme për të adresuar kërcënimet e sigurisë ushqimore në mbarë botën pas ndërprerjeve në industrinë bujqësore ruse dhe ukrainase.
Përpjekjet shtesë vijnë pasi zyrtarë të lartë të administratës thonë se Biden, i cili mori pjesë në një seri takimesh të enjten në kuadër të samitit të jashtëzakonshëm të NATO-s, po përpiqet të shtojë presionin mbi kombet e tjera për të rritur mbështetjen e tyre ndaj Ukrainës, ndërsa ai vetë ka qenë nën presion në shtëpi për të bërë më shumë.
Ndërsa SHBA njoftoi përpjekje të reja rreth sanksioneve dhe refugjatëve, ajo nuk bëri asnjë angazhim të ri ushtarak – pavarësisht kërkesave të Presidentit të Ukrainës Volodymyr Zelenskyy.
“Unë thjesht dua që ju të dini se aleanca mund të parandalojë ende vdekjet e ukrainasve nga sulmet ruse, nga pushtimi rus, duke na siguruar të gjitha armët që na duhen,” u tha Zelenskyy udhëheqësve të NATO-s, duke folur online.
Zelenskyy i tha NATO-s se vendi i tij ka ende nevojë për më shumë pajisje ushtarake, veçanërisht tanke dhe avionë luftarakë dhe i qortoi ata që nuk kanë krijuar një zonë të ndaluar fluturimi.
“Ju keni të paktën 20,000 tanke, Ukraina kërkoi që një për qind, një për qind e të gjithë tankeve tuaja të na jepen, ose shiten neve”, tha Zelenskyy në një fjalim në NATO. “Por, ne ende nuk kemi një përgjigje të qartë. Gjëja më e keqe gjatë luftës është të mos kesh përgjigje të qarta ndaj kërkesave për ndihmë.”
Biden ka dhënë 2 miliardë dollarë ndihmë ushtarake për Ukrainën që nga fillimi i presidencës së tij, duke përfshirë një paketë ushtarake prej 800 milionë dollarësh javën e kaluar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje