.png)
Java e 26-të e Superiores flet e gjitha për Tiranën, që mbetet 9 pikë para vendit të dytë edhe pas ndeshjes së Kukësit rival. Skënderbeu u ka bërë një “nder” bardhebluve, duke mundur Kukësin 2-1 në Korçë, në një ndeshje pa tifozë pas vendimit të fundit të FSHF-së. Bregu realizoi një gol të bukur, ndërsa Dita dyfishoi shifrat pas pak minutash. Valon Et’hemi vetëm sa ndezi shpresat e veriorëve në fundin e pjesës së parë, sepse në vazhdim nuk ndryshoi asgjë dhe Kukësi doli pa pikë në Korçë.
Skënderbeu ngjitet në vend të katërt me 41 pikë dhe kjo ishte fitorja e katërt radhazi, ndërsa Kukësi duket se e ka harruar trepikëshin. Edhe ndryshimi i bërë në stol, ku vendin e Duros e zuri Shehi, nuk e ka ndryshuar situatën te skuadra verilindore, që gradualisht e sheh titullin të largohet. “Mjeshtri” Ilir Daja ia ka dhënë një mësim “nxënësit” të tij Orges Shehi, të cilin e ka pasur lojtar kur drejtonte Skënderbeun.
Partizani ka marrë goditjen e radhës në Shkodër, ku gjithashtu u luajt pa tifozë. Të kuqtë janë mundur 1-0 në “Loro Boriçi”, me një penallti shumë të diskutueshme të dhënë nga kryesori Cjapi. Pas kësaj humbjeje ata mbeten në vend të 6-të dhe tashmë janë më afër zonës së rënies se asaj europiane, sepse për titull as që bëhet fjalë. Stafi i Partizanit e ka kontestuar fuqishëm penalltinë e dhënë në favor të Vllaznisë, që vendosi ndeshjen.
Shkodranët, edhe pas këtij trepikëshi, mbeten në zonën e “play-out“-it, por tashmë janë vetëm 1 pikë larg Bylisit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje