.png)
Presidenti i zgjedhur Joe Biden ka në plan të emërojë dy diplomate me përvojë Wendy Sherman dhe Victoria Nuland si zyrtaret nr. 2 dhe nr. 3 në Departamentin e Shtetit, thanë dy burime që kishin dijeni për këtë çështje.
Zonja Sherman, një nga negociatoret kryesore të marrëveshjes bërthamore të vitit 2015 me Iranin, që Presidenti Donald Trump e braktisi, do të emërohet zv/sekretare e shtetit, thanë burimet, duke konfirmuar një njoftim që u shfaq për herë të parë në gazetën Politico.
Victoria Nuland, e cila ka shërbyer si diplomate e lartë amerikane për Evropën, ambasadore në NATO dhe zëdhënëse e Departamentit të Shtetit, do të emërohet nënsekretare e shtetit për çështjet politike, ose nr. 3 i Departamentit, shtuan burimet.
Një zëdhënës i tranzicionit të zotit Biden nuk pranoi të komentojë; po kështu edhe zonja Nuland. Wendy Sherman, e cila ka qenë nënsekretare e shtetit për çështjet politike gjatë administratës Obama, nuk i është përgjigjur kërkesave për koment.
Nëse konfirmohen nga Senati, Sherman dhe Nuland do të shërbenin nën zotin Antony Blinken, i përzgjedhur nga zoti Biden si sekretari i ri i shtetit.
Të dyja kanë përvojë të hershme në Departamentin e Shtetit; Sherman si e emëruar politike dhe Nuland si diplomate karriere.
Zonja Sherman, ka qenë këshilltare e Departamentit të Shtetit nga viti 1997 në 2001, kur ajo ka qenë gjithashtu koordinatore e politikave për Korenë e Veriut. Nga 1993 në 1996 ajo ka qenë si ndihmëse sekretare e shtetit për çështjet legjislative.
Zonja Sherman aktualisht është profesore në Shkollën John F. Kennedy për Qeverisjen të Universitetit Harvard dhe këshilltare e lartë në Grupin Albright Stonebridge, një firmë e strategjisë dhe diplomacisë komerciale.
Zonja Nuland, ish-ndihmës sekretare e shtetit për çështjet evropiane, ka qenë zëvendës këshilltare për sigurimin kombëtar të nënpresidentit Dick Cheney nga viti 2003 në 2005 dhe shefe stafi e zëvendës sekretarit të shtetit nga viti 1993 në 1996. (VOA)
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje