.png)
Me nisjen e vitit të ri nisi edhe zyrtarisht detyra e Shqipërisë si një nga 10 anëtarët e përkohshme të Këshillit të Sigurimit, organi më i lartë vendimmarrës i Organizatës së Kombeve të Bashkuara.
Shqipëria u zgjodh në muajin qershor për herë të parë anëtare e Këshillit të Sigurimit pas 66 viteve anëtarësimi në OKB. Mandati zgjat dy vite. Marrja zyrtare e detyrës u përshëndet nga Ambasada e SHBA në Tiranë.
“Urime Shqipërisë në këtë arritje madhore për nisjen zyrtare të detyrës në Këshillit e Sigurimit të OKB, për herë të parë në histori. SHBA pret me padurim që të punojë me Shqipërinë për të adresuar në Këshillin e Sigurimit sfidat më madhore që përballet bota sot”, thuhet në deklaratën e Ambasadës.
Marrja e detyrës në këtë Këshill është përshëndetur edhe nga ministrja e Jashtme, Olta Xhaçka gjatë mesazhit urues për vitin e ri.
“Shqipëria do ta përdorë këtë mundësi për të avancuar çështjen e Kosovës, procesin e njohjeve dhe anëtarësimeve në organizata ndërkombëtare sepse Kosova ka qenë, është e do të jetë një kauzë e shenjtë për Shqipërinë. Do të punojmë për shqiptarët, por do të punojmë edhe për rajonin tonë për të konsoliduar arritjet e dekadave të fundit e për mos ta lënë atë të rrëshqasë drejt destabilizimit e tensioneve”, tha Xhaçka.
Kjo është hera e parë në 66 vite prej anëtarësimit në OKB, që Shqipëria fiton mandatin dy vjeçar për një vend jo të përhershëm në Këshillin e Sigurimit të Kombeve të Bashkuara. Ky këshill përbëhet nga 15 anëtarë. Pesë prej tyre (SHBA, Britania e Madhe, Franca, Rusia dhe Kina) janë të përhershëm dhe me të drejtë vetoje, ndërsa 10 anëtarët e tjerë janë me mandat dyvjeçar pa të drejtë vetoje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje