.png)
Më shumë se 60% e njerëzve të anketuar besojnë se NATO duhet të dalë në mbrojtje të Ukrainës nëse Rusia e pushton.
Shumica në të gjithë Evropën mendojnë se Rusia do të pushtojë Ukrainën në vitin 2022 dhe besojnë se NATO dhe BE duhet të qëndrojnë në krah të Kievit, sipas një studimi, autorët e të cilit sugjerojnë se kriza mund të përfundojë dramatikisht duke ndryshuar edhe mënyrën se si evropianët e shohin sigurinë e tyre.
“Të dhënat sugjerojnë një zgjim gjeopolitik në Evropë,” tha Mark Leonard, drejtor i Këshillit Evropian për Marrëdhëniet me Jashtë (ECFR), i cili kreu sondazhin në shtatë vende, që përbëjnë dy të tretat e popullsisë së BE-së.
“Shtetet e BE-së janë portretizuar si të ndara, të dobëta dhe jo aktive për Ukrainën, por qytetarët evropianë janë të bashkuar: ata pajtohen se Vladimir Putin mund të ndërmarrë veprime ushtarake dhe se Evropa, së bashku me partnerët e saj të NATO-s, duhet të shkojnë në ndihmë të Ukrainës”
Autorët e studimit thanë se sondazhi tregoi se “nuk kishte më shumë të vërteta në klishenë që evropianët besojnë se lufta është e paimagjinueshme dhe e marrin paqen si të mirëqenë”. Ata e perceptojnë botën e tyre si në një gjendje të paraluftës dhe jo të pasluftës.
Sondazhi, i kryer në fund të janarit, tregoi se shumica në gjashtë nga shtatë vendet e anketuara besonin se Rusia do të pushtonte Ukrainën gjatë vitit 2022, me ata që janë më afër kufirit lindor të Evropës përgjithësisht më të bindurit.
Finlanda (44%) ishte pak më e largët me këtë ide, por tutje 51% e të anketuarve në Francë dhe Itali, 52% në Gjermani, 55% në Suedi, 64% në Rumani dhe 73% e atyre në Poloni thanë se mendonin se një pushtim rus ishte i mundshëm këtë vit.
Shumica në të shtatë vendet e panë NATO-n dhe 30 shtetet e saj anëtare individuale si mbrojtësit kryesorë të sovranitetit ukrainas, por gjithashtu ndjenë qartë se BE-ja duhet të mbante një përgjegjësi të fortë për të dalë në mbrojtje të Ukrainës në rast të agresionit rus.
Në Finlandë, 56% e të anketuarve mendonin se BE-ja do të ishte e pozicionuar mirë për t’i ardhur në ndihmë Ukrainës dhe 59% mendonin se NATO-ja do ta bënte këtë.
Tutje shifrat ishin: 53% dhe 55% për Francën; 47% dhe 50% për Gjermaninë; 64% dhe 67% për Italinë; 80% dhe 79% për Poloninë; 57% dhe 63% për Rumaninë; dhe 61% dhe 64% për Suedinë.
Të pyetur se kujt i besonin më shumë për të mbrojtur interesat e qytetarëve të BE-së nëse Rusia pushton Ukrainën, të paktën gjysma e të anketuarve në secilin vend – duke u rritur në më shumë se 60% në Poloni, Suedi, Itali dhe Rumani – thanë se i besonin BE-së. Në dy vende, Suedi dhe Finlandë, besimi në BE ishte edhe më i madh se në NATO.
Besimi në Uashington si njëlloj i përkushtuar për të mbrojtur interesat e qytetarëve të BE-së ishte dukshëm më i ulët, me më shumë të anketuar në të gjitha vendet jashtë Polonisë dhe Rumanisë që thanë se i besonin Gjermanisë më shumë sesa SHBA-së.
Edhe në Poloni, NATO (75%) dhe BE (67%) shiheshin si më të besueshëm se SHBA.
“Ndërsa shumica e evropianëve ende i besojnë NATO-s për të mbrojtur Evropën, ‘Nato’ nuk është më vetëm një emër tjetër për ‘SHBA,” thanë autorët.
“Evropianët i besojnë NATO-s për të mbrojtur interesat e tyre më shumë se sa i besojnë SHBA-së për ta bërë këtë”.
Studimi dëshmon gjithashtu se “Brexit do të thotë Brexit”, thanë ata: pavarësisht “shfaqjes se solidaritetit të shfaqur të Londrës me Kievin”, pak e panë një rol për Mbretërinë e Bashkuar. Vetëm në Poloni (66%) dhe Suedi (52%) shumica menduan se Britania duhet t’i vinte në ndihmë Ukrainës.
Studimi tregoi gjithashtu se evropianët ishin të përgatitur të pranonin kërcënime të rëndësishme, potencialisht afatgjata si rezultat i mbrojtjes së Ukrainës, duke përfshirë ardhjen e mundshme të një numri të madh refugjatësh, kostot më të larta të energjisë, sulmet kibernetike dhe kërcënimin e veprimit ushtarak rus.
Të anketuarit në Poloni, Rumani dhe Suedi kishin më shumë gjasa të thoshin se për ti ardhur në ndihmë Ukrainës “ia vlente rreziku” i të gjitha këtyre pasojave të mundshme.
Ndoshta në mënyrë kritike, megjithatë, qytetarët në Francë dhe Gjermani ishin më pak të gatshëm të mbanin ndonjë nga këto barra të mundshme, thanë autorët e raportit.
Shumica në të gjitha vendet, përveç Suedisë (47%) thanë se varësia energjetike ishte sfida më e madhe e vetme nga qëndrimi i Rusisë ndaj Ukrainës, një pikëpamje që ishte më e theksuar në Poloni (77%).
Putini mund të habitet kur sheh se shumë evropianë “do ta shihnin një tjetër pushtim rus të Ukrainës si një sulm jo vetëm ndaj një vendi fqinj, por edhe ndaj vetë rendit evropian të sigurisë”, përfunduan autorët.
“Dhe është e habitshme që kaq shumë të anketuar – nga veriu, jugu, lindja dhe perëndimi – mendojnë se ky rend duhet të mbrohet”
Me disa qartazi më pak të gatshëm për të përballuar koston se të tjerët, “mënyra se si evropianët do të trajtojnë javët e ardhshme do të jetë thelbësore për të ardhmen e sigurisë evropiane”, thanë ata.
Marrë nga “The Guardian”/ Përshtati në shqip Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje