Superiore/ Duele në distancë për kreun, Tirana drejt Europës nga Korça

Tirana mund të përfitojë edhe këtë javë për t’u futur në zonën europiane. Orges Shehi kthehet si kundërshtar në Korçë, aty ku bëri historinë si kapiten i ekipit. Në krye të Tiranës ai po bën shumë mirë javët e fundit dhe një fitore e mundshme sot ndaj Skënderbeut do të kishte vlera të mëdha, sepse rivalët kanë ndeshje të vështira, Laçi pret Vllazninë, ndërsa Teuta shkon në Fier.

Nuk do të jetë e lehtë për kampionët në fuqi, pasi korçarët kanë marrë superxhiro dhe kanë shtuar ndjeshëm shanset e mbijetesës. Të besuarit e Memellit kanë arritur të mundin ekipe si Partizani, Apolonia dhe Kukësi në transfertë, ndaj dhe kryeqytetasit janë të paralajmëruar.

Laçi-Vllaznia është ndeshja më e fortë e javës së 27-të të Superiores. Kurbinasit vijnë pas 2 humbjesh, që u kanë kushtuar në tabelën e klasifikimit, ndaj dhe sot do të shkarkojnë të gjitha “bateritë” për t’u kthyer te fitorja. Ata ia dinë sekretet Vllaznisë, pasi e kanë mundur dy herë, edhe në “Loro Boriçi”. Nga ana tjetër, në kampin shkodran ka besim se këtë herë nuk do të dilet pa pikë ndaj Laçit.

Teuta kryesuese ndoshta e ka më të lehtë në letër, teksa ndeshet me Apoloninë në Fier. Kundërshtari thuajse i ka dhënë lamtumirën Suepriores, edhe pse jo matematikisht. Durrsakët gëzojnë një formë mjaft të mirë dhe kanë moralin e duhur për të përballuar çdo kundërshtar në këtë moment. Kjo javë e Superiores mbyllet me Partizani-Bylis, që luhet të dielën në Elbasan. Teuta dhe Vllaznia kryesojnë me nga 46 pikë, pastaj vijnë Laçi dhe Partizani me nga 44, Tirana ka 41 pikë.

Java e 27-të
Sot
Kastrioti-Kukësi
Skënderbeu-Tirana
Laçi-Vllaznia
Apolonia-Teuta
Të dielën
Partizani-Bylis

---

Copyright © Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.

---