.png)
Koalicioni “Shtëpia e Lirisë” ka ngritur grupet e punës në të gjashtë bashkitë ku do të mbahen zgjedhjet e pjesshme vendore më 6 mars për Kryebashkiak. Fushata do të drejtohet nga anëtarët e Komisionit të Rithemelimit, ndërsa do të mbështetet nga LSI dhe PDK, dy partitë që kanë themeluar këtë koalicion.
Në Durrës, drejtues i fushatës është caktuar Oerd Bylykbashi ndërsa fushata për këtë bashki do të mbështetet edhe nga dy deputetët Albana Vokshi e Agron Shehaj, si dhe dy ish-zyrtarët e PD-së, Ivi Kaso dhe Enno Bozdo.
Fushata në Shkodër do të drejtohet nga Belind Këlliçi, që do të ketë mbështetjen e Edith Harxhit e Aldo Bumçit. Nard Ndoka pritet gjithashtu që të jetë aktiv në fushatë vetëm në këtë bashki, megjithëse në zgjedhjet e 25 prillit si kandidat nuk mori më shumë se 300 vota.
Vora, ku pritet që të jetë një betejë e ashpër, i është besuar Flamur Nokës, i konsideruar krahu i djathtë i Sali Berishës në “Foltoren” e tij. Lushnja do të drejtohet nga Tritan Shehu, ku i angazhuar do të jetë edhe Klevis Balliu.
Në Dibër, fushata e Berishës do të drejtohet nga Çlirim Gjata, që në këtë bashki do të ketë kundër të tre deputetët demokratë të qarkut, të drejtuar nga Xhelal Mziu.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje