.png)
Presioni i madh politik dhe një “Jo” unanime nga ana e tifozëve bëri që 6 skuadrat angleze të tërhiqeshin nga Super Liga. Liverpuli, Totenhemi, Arsenali, Çelsi, Mançester Siti dhe Junajtid duket se e kanë braktisur përfundimisht turneun e ri “anti-Çampions”, që e themeluan bashkë me Real Madridin, Barcelonën, Atletiko Madridin, Juventusin, Interin dhe Milanin.
Por, me sa duket, nuk janë vetëm arsyet e përmendura më lart ato që sollën tërheqjen e klubeve angleze: sipas “Mundo Deportivo”, ka edhe një arsye ekonomike, një ofertë e mirë parash nga ana e UEFA-s.
E përditshmja spanjolle shkruan se UEFA ka luajtur një rol thelbësor në vendimin e “Big Six” për të dalë nga Super Liga. Qeveria e futbollit europian u ka bërë atyre një propozim ekonomik për t’i bindur të tërhiqen. Një ofertë e tillë, sipas “Mundo Deportivo”, nuk u është bërë klubeve spanjolle, që nga organi që drejton futbollin europian, shihen si armiku kryesor, të udhëhequr nga Real Madrid dhe Florentino Perez.
Për këtë arsye, skuadrat spanjolle nuk kanë mbajtur ende qëndrim negativ në lidhje me zhvillimin e turneut. Madje, Barcelona dhe Real Madrid duken larg nga ideja e tërheqjes nga Super Liga.
Janë tërhequr ndërkohë zyrtarisht Interi fillimisht dhe tashmë edhe Milani, duke pohuar se janë treguar të ndjeshëm ndaj reagimit të tifozëve. Po ashtu, edhe Andrea Anjeli, presidenti i Juventusit, ka thënë se turneu i ri është duke perënduar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje