.png)
Ndeshja mes Flamurtarit dhe Teutës, e ndërprerë dje për shkak të fushës së përmbytur nga reshjet e shiut, ka luajtur sot 81 minutat e mbetura. Ka dominuar Teuta, që ka fituar me rezultatin 1-3, falë dygolëshit të Emiljano Vilës dhe një goli të Sherif Kallakut. Trajneri Edi Martini, në dy ndeshje në krye të durrsakëve, ka marrë 6 pikë dhe tashmë “Djemtë e Detit” janë ngjitur në kuotën e 28 pikëve.
Ishte kjo ndeshja që mbylli vitin 2019 në Superiore, ku lufta për titullin kampion duket shumë e ashpër. Teuta mban vendin e 5-të, por është në të njëjtën kuotë pikësh me Partizanin dhe Tiranën, ndërsa kreu që mbahet nga Kukësi është vetëm 3 pikë larg. Vazhdon të qëndrojë në pozita pretenduese edhe Bylisi, me 1 pikë më pas se Kukësi dhe që nuk mund të konsisderohet më surprizë, pavarësisht se do ta ketë shumë të vështirë të rezistojë.
Superiorja nis pushimet dhe e gjithë vëmendja është te merkato e dimrit, duke pritur afrimet dhe largimet e skuadrave me pretendime. Partizani dhe Tirana kanë më shumë punë se të tjerët, sepse para së gjithash duhet të gjejnë trajnerin e ri. Për bardheblutë nuk do të ishte çudi që të vazhdonin me Emanuel Egbo në stol, pasi me të në krye kanë marrë tri fitore radhazi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje