.png)
Barazimi 1-1 në stadiumin “Niko Dovana” ndaj Teutës e ka ngjitur Tiranën në vend të parë, me pikë të barabarta me Partizanin (18 pikë), por me golaverazh më të mirë se të kuqtë. Skuadra e Ahmatajt mund të ishte shkëputur, nëse nuk do të ishin minutat shtesë, kur Hoxha barazoi për durrsakët. Majkëll Ngo e kishte kaluar Tiranën në avantazh në pjesën e parë dhe më pas bardheblutë patën edhe disa raste të tjera për shënim. Hoxhallari u ndëshkua me karton të kuq dhe e la Tiranën me 10 vetë në fundin e ndeshjes. Teuta barazoi në frymën e fundit, duke i hequr fitoren nga duart skuadrës kryeqytetase, ndërkohë që pas ndeshjes pati edhe tension mes lojtarëve.
Në ndeshjen tjetër të javës së 11 të Superiores, Laçi ka bërë ligjin në Korçë, ku ka shënuar 4 gola, duke zhvlerësuar avantazhin momental të Skënderbeut me Gripshin. Sulmuesi Nuabueze ishte sërish protagonist për Laçin me 2 gola të shënuar. Lushkja dhe Xhixha janë autorët e dy golave të tjerë për kurbinasit. Korçarët duken në vështirësi dhe duhet të marrin masat që tani për mbijetesën, ndërsa Laçi, me ardhjen e Cungut, po ecën me ritme të larta.
Partizani ka shansin të marrë sërish kryesimin sot në ndeshjen me Luftëtarin. Një ndeshje e lehtë në letër për të kuqtë e Lerdës, ndërsa Kukësi ndeshet në stadiumin e Lushnjës me Flamurtarin. Java e 11-të mbyllet me ndeshjen Vllaznia-Bylis, që luhet ditën e hënë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje