.png)
Indinjata është e madhe nga faktorë të ndryshëm të futbollit europian, të gjithë kundër Super Ligës dhe lakmisë së klubeve të pasura për më shumë para. Në Angli e kanë quajtur një akt kriminal kundër tifozëve turneun e ri, madje shumë figura të njohura kanë dalë hapur kundër klubeve të tyre, siç është rasti i Geri Nevill dhe Rio Ferdinand. Premier Liga është gati të përjashtojë 6 klubet që aderojnë në Super Ligë dhe për këtë do të ketë një mbledhje të veçantë.
UEFA ndërkohë ka konfirmuar sot formatin e ri të Ligës së Kampionëve, që do të zgjerohet në 36 skuadra, duke filluar nga viti 2024. Është kjo ajo që kanë kërkuar më parë disa nga klubet e njohura, mes tyre gjigantët gjermanë të Bajern Mynih dhe Borusia Dortmund. Formula e re parashikon ndeshje në një grup të vetëm dhe lë të hapur mundësinë e “final four”. Detajet do të saktësohen brenda dhjetorit të këtij viti.
Komitetit Ekzekutiv të UEFA-s tani i ka dalë një tjetër punë, që ka të bëjë me Super Ligën e krijuar nga 12 top-club-et. Pjesëtarë të këtij institucioni kanë kërkuar marrjen e masave të menjëhershme, deri në përjashtimin e tyre nga Championsi aktual dhe nga kampionatet kombëtare.
Presidenti i UEFA-s, Aleksandër Ceferin, ka sulmuar presidentin e ECA-s dhe të Juventusit, Andrea Anjelin, duke e quajtur një njeri fals. “Folëm të shtunën dhe më tha se zërat që qarkullonin për krijimin e Super Ligës ishin vetëm zëra. Më pas mbylli telefonin. Nuk kam parë kurrë më parë një njeri kaq fals. Ishte një zhgënjim shumë i madh”, – ka thënë Ceferin për drejtuesin e lartë italian.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje