.png)
Mesi bën gjithçka vetë, në çerekfinale kalon PSG e Kilian Mbape. Pas 4-1 në “Camp Nou”, “remuntada” dukej e pamundur dhe kështu ishte vërtet. Ndeshja në Paris ka përfunduar në barazim, 1-1, edhe pse miqtë dominuan.
Katalanasit, të shoqëruar nga presidenti i ri Joan Laporta, provuan përmbysjen, dominuan duke bërë një figurë shumë të mirë, por vetëm kaq. Pas 13 vitesh, për herë të parë që nga 2007-a, ata nuk kalojnë në çerekfinale të Ligës së Kampionëve. Është fundi i një ere në fakt, sepse për herë të parë që nga 2005-a e largët nuk janë në çerekfinale të Championsit as Messi dhe as Ronaldo.
Mbape realizoi golin e avantazhit me penallti, Mesi barazoi me një “golazo”, por në momentin kyç të ndeshjes ai humbi një penallti, që do t’i jepte avantazhin Barcelonës, Gjuajtja e argjentinasit u prit nga Kejlor Navas, më i miri në fushë për PAG-në, që vuajti shumë. Në fakt, penalltia duhej përsëritur, sepse Verrati hyri në zonë përpara gjuajtjes.
Pjesa e parë ishte e jashtëzakonshme, me ritëm shumë të lartë. Barcelona luajti me De Jong në mbrojtje, por mbi të gjitha me përqendrim të lartë. Spanjollët krijuan 8 raste për gol, por shënuan vetëm një herë. Katër raste u shpërdoruan nga Dembele. Mesi shënoi golin e parë në aksion në këtë Champions, ndërsa Navas u bë shpëtimtar me 4 pritje, 2 herë i ndihmuar edhe nga traversa. Gabimi i Mesit nga pika e bardhë e uli entuziazmin e Barcelonës në pjesën e dytë. Katalanasit mbajtën topin, por pa e dëmtuar PSG-në, që bëri një lojë mbrojtëse.
Në çerekfinale të Ligës së Kampionëve ka kaluar edhe Liverpuli, që përsëriti ndeshjen e parë ndaj gjermanëve të Lajpcigut, duke fituar 2-0 edhe në kthim. Edhe këtë herë shënuan Salah dhe Mane.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje