.png)
Një gol i Pol Pogba në “San Siro” i ka dhënë kualifikimin në çerekfinale të Ligës së Europës Mançester Junajtid. Anglezët ishin favoritë ndaj Milanit, por barazimi 1-1 në “Old Trafford” i jepte shpresë skuadrës së Piolit, që sërish kishte mungesa, aq sa Kastilejo u aktivizua në rolin e 9-ës false.
Pogba, 2 minuta pas futjes në fushë në pjesën e dytë, realizoi golin e vetëm të ndeshjes. Edhe futja e Ibrahimoviçit në fushë nuk e ndryshoi rezultatin dhe kështu Milani i ka dhënë lamtumirën Europës. Vetëm Roma e Kumbullës përfaqëson Italinë në Europë tashmë, pasi gjithë skuadrat e tjera janë eliminuar.
Në mënyrë të befasishme është eliminuar Totenhemi i Mourinjos, që është turpëruar në Kroaci nga Dinamo e Zagrebit. Kroatët e mbyllën kohën e rregullt me rezultatin 2-0, aq sa kishte përfunduar ndeshja e parë në Angli. Heroi i Dinamos ishte sulmuesi Orsiç, i cili në shtesë shënoi edhe golin e tretë personal, duke i dhënë kualifikimin skuadrës së tij.
Një kualifikim surprizë ishte edhe ai i Sllavias së Pragës në fushën e Gllasgou Rejnxhërs. Çekët fituan 0-2 në Skoci, ku golin e parë e realizoi ish-sulmuesi i Skënderbeut, Peter Olainka. Tetë skuadrat çerekfinaliste të Ligës së Europës janë: Arsenal, Granada, Roma, Dinamo Zagreb, Mançester Junajtid, Vilarreal, Sllavia Pragë dhe Ajaks.
Liga e Europës, 1/8
ARSENAL-Olimpiakos 0-1 (3-1)
Molde-GRANADA 2-1 (0-2)
Shakhtar-ROMA 1-2 (0-3)
DINAMO ZAGREB-Totenhem 3-0 (0-2)
Milan-MANÇESTER J 0-1(1-1)
Rejnxhërs-SLLAVIA PRAGË 0-2 (1-1)
VILARREAL-Dinamo Kiev 2-0 (2-0)
Jang Bojs-AJAKS 0-2 (0-3)
Shënim: Me kapitale skuadrat e kualifikuara, në kllapa rezultatet e ndeshjeve të para
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje