.png)
Ministrja e Jashtme Olta Xhacka ka zgjedhur ta zhvillojë vizitën e parë zyrtare pas ardhjes në detyrë, në Itali, ku edhe është pritur nga homologu i saj, Luigi Di Maio.
Gjatë takimit të zhvilluar mes tyre, Xhaçka dhe Di Maio konfirmuan se kanë përfunduar zyrtarisht procedurat për njohjen reciproke të lejeve të drejtimit të automjeteve mes dy vendeve.
“Arritëm marrëveshjen për njohjen reciproke të lejeve të drejtimit, me qëllim konvertimi. Nënshkrimi i marrëveshjes javën e ardhshme në Tiranë mes strukturave përgjigje. Veprime konkrete si ky, ofron një impakt konkret për qytetarët. I shpreh Di Maios dhe qeverisë italiane mirënjohje për solidaritetin dhe kontributin e dhënë”, tha Xhaçka.
Ministri i Jashtëm italian Di Maio, foli në lidhje me zgjedhjet parlamentare më 25 prill, duke i bërë thirrje partive politike se duhet të japin prova demokracie. “Të gjitha forcat politike duhet të japin prova demokracie. Zgjedhjet, forcat politike të japin mesazhin se interesi kombëtar qëndron mbi interesat partiake”, u shpreh Di Maio.
Sipas njoftimit të Ministrisë së Jashtme, Ministrja Xhaçka tha se komuniteti arbëresh në Itali është urë lidhëse mes dy popujve. Ajo shtoi se duhet të nxitet bashkëpunimi ekonomik dhe shkëmbimet tregtare mes Shqipërisë dhe Italisë.
“Komuniteti arbëresh në Itali, urë lidhëse mes dy popujve tanë. Nxisim bashkëpunimin ekonomik dhe shkëmbimet tregtare mes dy vendeve. Shumë shpejt nis punën Komisioni i Përhershëm Ekonomik Shqipëri – Itali. Shteti italian për ne, është si një avokat i palodhur i integrimit të Shqipërisë në Bashkimin Evropian”, u shpreh ministrja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje