.png)
Ambasadorja e SHBA-së në Tiranë, Yuri Kim, ishte në fundjave në Shkodër, në një nga qytetet e saj të preferuara, për të cilën ajo ka folur shpesh herë.
Nuk bëri përjashtim as për vizitën e fundit.
Kujdesshëm, ambasadorja Kim rreket që të flasë për kulturën e Shkodrës, muzeun Marubi, madhështinë e Kalasë së Rozafës dhe qytetarinë shkodrane. Dhe jo vetëm.
Në takimet me ta, pikërisht në qytetin ku nuk do shumë kalem për të kuptuar situatën politike dhe makinacionet që përdoren, ambasadorja Kim të hënën përmes një postimi në Twitter ka shpjeguar atë që ajo ka vërejtur nga afër.
Questions for candidates: If your main sponsor is someone designated by the US for significant corruption, what exactly are you promising voters? Who will own you if you win and what will you owe them? What should Albanians expect? What should the US expect?
— Ambassador Yuri Kim (@USAmbAlbania) February 21, 2022
“Pyetje për kandidatët: Nëse mbështetësi juaj kryesor është dikush i përcaktuar publikisht nga Shtetet e Bashkuara të Amerikës për korrupsion madhor, çfarë po u premtoni votuesve saktësisht?”, thotë Kim.
Ambasadorja më tej ngre shqetësimin se çfarë duhet të presin SHBA nga këta kandidatë, nëse fitojnë në zgjedhjet e 6 marsit.
“Kush do t’ju zotërojë nëse fitoni dhe çfarë do t’i detyroheni atyre? Çfarë duhet të presin shqiptarët? Çfarë duhet të presin Shtetet e Bashkuara?”, deklaron ajo.
Disa pyetje që ajo i shtroi pas vizitës në Shkodër aty ku kandidon Bardh Spahia i koalicionit “Shtëpia e Lirisë” por që politikisht përfaqësohet me fytyrën e Sali Berishës i shpallur “non-grata” nga SHBA dhe ish-prefektja, Majlinda Angoni nga PS-ja e cila në këtë fushatë po mbështetet nga Tom Doshi i PSD-së edhe ai i shpallur “non grata” nga SHBA.
Bardh Spahia është kandidat që ka punuar si me Berishën ashtu edhe me Bashën. Këto zgjedhje, ai ka zgjedhur ish-kryeministrin dhe nga sondazhet paraprake shihet si kandidati favorit për Shkodrën.
Tom Doshi aktualisht kryetar i PSD fitoi tre mandate zgjedhjet e fundit parlamentare. Dhe ndikimi i tij në Shkodër në disa territore të caktuara nuk është i vogël. Aleancat e tij lokale me PS-në kanë sjellë herë pas here edhe debate brenda PS-së për ndikimin që ai ka në emërime drejtoresh në poste kyçe.
Për të mos harruar që në këto zgjedhje një rol të konsiderueshëm po luan edhe Vangjush Dako i pa impenjuar publikisht me funksione të rëndësishme politike porse në Durrës po lobon për kandidaten që deri më tash ishte kryetare e Bashkisë së Durrësit, Emirjana Sako
Ai vijon të zhvillojë takime me përfaqësuesit e socialistëve në Durrës, madje duke i drejtuar ata.
Dako nuk kandidoi për kryetar bashkie në zgjedhjet e 2019-ës dhe Rama e justifikoi këtë vendim si zgjedhje personale të ish-kryebashkiakut. Që dukshëm nuk është aq personale dhe e sinqertë sa kohë që në shumicën e takimeve per zgjedhjet e 6 marsit, ai drejton mbledhjet ndërsa Emirjana Sako mban shënime.
Vangjush Dako ka qenë dy herë kryetar i bashkisë së Durrësit duke fituar bindshëm në këtë qytet për PS-në dhe po aq i përfolur nga opozita (dhe jo vetëm) për mënyrën se si ai ka vënë pasuri familjare. Opozita e ka akuzuar shpesh here për lidhje me krimin e organizuar dhe blerje votash
Kinse, ambasadorja amerikane në një postim të dytë të saj në Twitter la të kuptojë se pyetjet që u ka drejtuar kandidatëve jo domosdoshmërisht mund të lidhen vetëm me ata të Sali Berishës.
“Kujtesë! SHBA ka shpallur publikisht katër persona subjekte të aktit 7031”, shkruan ajo shkurtimisht.
Katër emrat e shpallur “non grata” janë Sali Berisha, Vangjush Dako, Tom Doshi dhe Adriatik Llalla. Ky i fundit nuk është në Shqipëri dhe as i përzier në zgjedhjet e fundit vendore. Por Berisha, Dako dhe Doshi janë dukshëm të përfshire.
Vizita sporadike e ambasadores amerikane në fundjavë në Shkodër vetëm sa e konfirmoi edhe njëherë këtë gjë.
Aleancat në qytetet ku luhet shumëçka për fituesin po luajnë fort.
Pikërisht nga ata që janë shpallur “non grata”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje