.png)
Gazeta Si – Një operacion i studiuar për gati dy muaj dhe që përfundoi me një sulm që zgjati disa orë. Ky është rindërtimi i parë i sulmit për eliminimin e liderit të Shtetit Islamik, Abu Ibrahim Hashemi al Quraishi.
Historia e burimeve pason atë të “ndjekjeve” të tjera të terroristëve. Gjithçka fillon – dhe nuk mund të ishte ndryshe – me një burim që arriti në inteligjencën amerikane rreth tre muaj më parë. Bëhet fjalë për një familje që jeton në një shtëpi trekatëshe në Atmeh, rajoni sirian i Idlibit, pranë kufirit me Turqinë.
Me qira
Familja përbëhet nga një burrë rreth të dyzetave dhe të afërmit e tij, gratë dhe fëmijët. Sipas burimeve të inteligjencës, ai ka ikur nga Alepo për shkak të luftës, katin e sipërm e ka marrë me qira, ndërsa poshtë jetojnë të tjerë. Ai është i matur, herë pas here vizitohet nga disa miq. Këta janë korrierë që përdoren për të komunikuar me vartësit e tij.
Amerikanët fillojnë me mbikëqyrje më aktive. Një ekspert në Twitter vë në dukje se në fillim të nëntorit, një avion i luftës elektronike RC 135, i pajisur me pajisje të sofistikuara, kryen fluturime të përditshme në këtë sektor: avioni niset nga Katari, arrin në veriperëndim të Sirisë dhe “kreh” hapësirën dhe më pas hyn përsëri.
Një manovër e përsëritur për javë të tëra. Para dy ditësh, rastësisht, ai u kthye në Shtetet e Bashkuara të Amerikës. A ka ndonjë lidhje me atë që ndodhi më vonë? Së bashku me sytë nga qielli, Uashingtoni mobilizon burimet në terren, duke shfrytëzuar njohuritë dhe aleancat në këtë kuadrat.
Spiunët
“Lagja” është interesante, duke qenë se disa qindra metra larg strehës, ndodhen dy posta ushtarake pro-turke dhe një nga HTS, ish-kaedistët e al Nusra-s. Për më tepër, Shtetet e Bashkuara kanë goditur shpesh me dronë falë informacionit të dhënë nga spiunët në terren, të futur mirë në këtë strehë të ekstremizmit. Pak nga pak formohet tabloja, vlerësohen rreziqet dhe skenari.
Më 20 dhjetor, presidenti Joe Biden merr një informim më të detajuar mbi vendndodhjen e al Quraishit, i ndjekur nga takime të përsëritura për të studiuar se cilin opsion të zgjedhë. Debati i përjetuar nga vetë Biden në kohën e bastisjes kundër Osama Bin Laden rikthehet, atëherë ai ishte i vetmi që shprehu një opinion negativ, pasi kishte frikë nga rreziqet.
Modeli
Edhe këtë herë, ushtria sjell një model të vogël të ndërtesës për të ilustruar objektivin e mundshëm, pikërisht siç ndodhi me Bin Ladenin.
Synimi fillestar ishte kapja e gjallë e Kalifit të ri, por ishte e qartë se ai do të rezistonte dhe për këtë arsye epilogu mund të ishte dramatik. Pas disa javësh analizë, Biden e theu vonesën, duke dhënë dritën jeshile. Një vendim në mes të një stuhie diplomatike për shkak të krizës ukrainase dhe përplasjes me rusët.
Në orën 17:00 të së mërkurës, presidenti mbyllet në Dhomën e Situatave në Shtëpinë e Bardhë me bashkëpunëtorët e tij më të afërt, përfshirë zv.presidenten Kamala Harris dhe ndjek sulmin që iu besua “Delta Force” drejtpërdrejt në video.
Ndërkohë, Pentagoni i ka komunikuar Moskës se do të ketë një operacion të një niveli të caktuar, duke paralajmëruar për të shmangur aksidentet.
Dronë dhe helikopterë
Komandot – rreth njëzet – transferohen me helikopter në afërsi të fshatit, lëvizjet mbulohen nga luftëtarë, dronë dhe ‘Apache’. Ata rrethojnë shtëpinë, paralajmërojnë njerëzit që janë brenda të dorëzohen, por marrin plumba në përgjigje, ndaj menjëherë reagon ushtria.
Videot e publikuara në rrjetet sociale, tregojnë të shtënat e automatikut të helikopterëve. Rrethimi përfundoi dy orë më vonë me një shpërthim të madh të shkaktuar, sipas zëdhënësve, nga vetë al Quraishi. Ai nuk u dorëzua, por preferoi të aktivizonte një bombë që shkaktoi vdekjen e grave dhe fëmijëve.
Një version që tenton të përjashtojë përgjegjësinë e SHBA-ve, por ka nevojë për konfirmim të pavarur.
Marinsat e Delta-s janë në gjendje të verifikojnë identitetin e objektivit – është gjithmonë tregimi zyrtar – duke përdorur gjurmët e gishtërinjve dhe një komplet të shpejtë të ADN-së dhe më pas braktisin kufomën në rrënoja.
Jashtë ka organe të tjera, përfshirë ato të dy guerilëve të fraksionit të HTS-së, që janë afruar për të kuptuar çfarë ka ndodhur.
Avaria
Nuk ka mbaruar. Një nga helikopterët – një MH 60 i 160-të fluturues, një njësi tjetër elitare – ka një avari, detyrohet të ulet në një fushë dhe komandot amerikane detyrohen ta hedhin në erë.
Megjithatë, mbeten shumë rrënoja dhe, sipas disa vëzhguesve, nuk është e sigurt që shpërthimi ka fshirë plotësisht komponentë interesantë.
E njëjta gjë ndodhi në bastisjen për të eliminuar Osama Bin Ladenin në Abotabad para më shumë se 10 vjetësh, me një tjetër MH60 të braktisur dhe të shkatërruar pjesërisht (thonë se kinezët arritën ta ekzaminonin).
Ekipi kthehet në bazë, Shtëpia e Bardhë feston suksesin e arritur pa humbur asnjë njeri, por nuk mungojnë kritikat për viktimat civile.
Joe Biden i flet kombit, duke thënë se sot bota është më e sigurt. Fraza dhe lëvizje rituale. Një fitore në një fushatë të gjatë: lideri ka vdekur, por Shteti Islamik është gjallë.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje