.png)
Edi Rama bën përherë zhurmë në Kosovë vitet e fundit, sidomos kur ai flet për dialogun me Serbinë, Albin Kurtin, ndërkombëtarët, kur takohet me Presidentin serb dhe kur nuk arrin të takohet me Kryeministrin e Kosovës, kur anullon mbledhjen e dy qeverive, e kur nuk pritet nga Kurti në Prishtinë.
Akoma më shumë javën e fundit pas sulmit terrorist të komandove serbe në Banjska. Dhe nuk është se vetë Rama ruhet apo kompleksohet nga qëndrimet që një pjesë e politikanëve të Kosovës mbajnë ndaj tij kur ai flet për dialogun, Vuçiçin, Kforin në Veri etj etj. Edi Rama si personazh shpesh herë e kërkon vetë polemikën, ndonjëherë tjetër bie në grackën e polemikave të padëshëruara jo edhe aq për faj të tij.
E tillë është edhe intervista e fundit në Financial Times, ku Rama e quajti Veriun e Kosovës tokë e askujt për shkak të kombinimit të gjithëfarëlloj kriminaliteti dhe rritjes së nacionalizmit, ku krimi dhe politika kanë humbur kufijtë mes tyre, e ku duhet ndërhyrja e ndërkombëtarëve, më saktë e Kforit që të vendosë kontrollin në Veri.
Vetëm se këtë radhë deklaratat e kryeministrit shqiptar janë nxjerrë nga konteksti pa dashje nga vetë gazeta britanike. Nuk mjaftoi as korrigjimi i vetë gazetarit dhe gazetës, të cilët thanë se me “tokë e askujt” Rama nuk i referohej Kosovës në tërësi, por vetëm situatës në Veri, që të ndalnin vrrullin e akuzave në Kosovë dhe Shqipëri. Në Kosovë, kritikat erdhën nga Vetëvendosja, sipas të cilës deklaratat janë ftesë për grabiqarë e plaçkitës, ndërsa në Tiranë nga Sali Berisha që e cilësoi Ramën Pashiqin shqipfolës që flet me gjuhën e Vuçic dhe Petrit Vasili për të cilin Rama duhet dënuar e bojkotuar.
Por çfarë tha Rama që bëri kaq shumë zhurmë dhe rrëmujë në ambjentin politik në Prishtinë e Tiranë? Më poshtë Gazeta Si po përcjell shkrimin e plotë me deklaratat e Kryeministrit shqiptar për Financial Times.
“NATO duhet të rivendosë kontrollin e veriut të Kosovës ose të përballet me dhunën e vazhdueshme midis serbëve etnikë dhe shqiptarëve në rajon, sipas kryeministrit të Shqipërisë”.
Rama, vendi i të cilit është anëtar i aleancës ushtarake, foli për Financial Times pasi terroristët serbë morën peng një manastir në Kosovën veriore, duke marrë të paktën katër jetë, duke përfshirë atë të një polici etnik shqiptar.
“Kosova është një pikë e nxehtë”, tha Rama.
“Me kalimin e viteve “[Veriu i Kosovës] është bërë një tokë e askujt ku të gjitha llojet e krimeve kombinohen me nacionalizmin në rritje. Kufiri mes krimit dhe politikës është zbehur”, u shprej ai për Financial Times.
NATO tha se do të vendoste sa më shumë trupa paqeruajtëse të nevojshme për të stabilizuar situatën, me Gjermaninë dhe Britaninë e Madhe që tashmë kanë premtuar qindra ushtarë në krye të forcës ekzistuese prej 4500 trupash për të mbajtur rajonin nën kontroll.
Udhëheqësit e Kosovës dhe Serbisë i kanë bërë gjithashtu thirrje NATO-s që të rrisë praninë e saj dhe të qetësojë tensionet. Kosova ka fajësuar Serbinë për sponsorizimin e sulmit dhe për lëvizjen e njësive të ushtrisë afër kufirit të Kosovës, në atë që tregonte qëllime luftarake. Beogradi mohoi të kishte plane të tilla, por po strehon udhëheqësin e milicisë, Milan Radojiçiq, i cili kreu rrethimin e manastirit.
Pas sulmit të atij manastiri, autoritetet e Kosovës gjetën një depo të madhe armësh, duke përfshirë eksplozivë, artileri të rëndë dhe automjete ushtarake.
Shqiptarët përbëjnë grupin etnik më të madh në Kosovë, i cili u shkëput nga Serbia në vitin 2008. Beogradi nuk e ka njohur atë si një komb të pavarur – një hap i ndërmarrë nga SHBA dhe shumica e vendeve të BE-së.
Një pakicë etnike serbe është e përqendruar në pjesën veriore të Kosovës dhe ka refuzuar autoritetin e Prishtinës, duke organizuar protesta dhe bllokada të shumta gjatë vitit të kaluar.
BE, SHBA dhe fuqitë e tjera perëndimore janë përpjekur të ndërmjetësojnë bisedimet midis Serbisë dhe Kosovës, por pavarësisht se ishin afër një marrëveshjeje në mars, propozimet u shpërbënë si rezultat i zgjedhjeve të diskutueshme komunale në veri të Kosovës.
Pas kësaj kryeministri i Shqipërisë Edi Rama avokoi për një “konferencë të nivelit të lartë” që përfshin liderët e Francës dhe Gjermanisë dhe riangazhimin e SHBA.
“Kjo është mënyra më e mirë për të dalë nga kjo çmenduri e pafund”, tha Rama.
Udhëheqësi shqiptar tha se ai kishte tërhequr tashmë vëmendjen për përkeqësimin e situatës së sigurisë në Kosovë gjatë një samiti të NATO-s në korrik.
Qëllimi, tha ai, ishte “njohja e plotë e Kosovës në BE dhe në Kombet e Bashkuara.
Nuk është e lehtë të ndryshosh rrjedhën e historisë, kjo kërkon lidership. Por nëse Franca dhe Gjermania mund ta bëjnë atë [pas Luftës së Dytë Botërore], nëse Arabia Saudite dhe Izraeli mund ta bëjnë atë, atëherë ne e dimë se mund të ndodhë.” Rama për një kohë të gjatë u përmbajt nga përfshirja në konfliktin e Kosovës, në vend të kësaj ndërtoi lidhje të përzemërta me Beogradin teksa kërkonte të bënte përparim në rrugën e anëtarësimit në BE për Ballkanin Perëndimor. Por duke pasur parasysh kërcënimin në rritje të sigurisë jo vetëm për shqiptarët në Kosovë, por edhe për rajonin në tërësi”, tha Rama.
Sipas tij, jostabiliteti në Ballkanin Perëndimor i shërben interesave të Moskës.
“Rusia e ka mbështetur prej kohësh Serbinë dhe nuk e ka njohur pavarësinë e Kosovës. Pas pushtimit të Rusisë në shkallë të plotë të Ukrainës vitin e kaluar, Beogradi i rezistoi thirrjeve perëndimore për të vendosur sanksione ndaj Rusisë. Kremlini do të dëshironte gjithashtu të shihte një Donbas të vogël në Kosovë dhe të ndezte një zjarr separatizmi në mes të Evropës”, tha Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje