.png)
Presidenti Ilir Meta akuzoi Lulzim Bashën se gënjeu mbështetësit e opozitës, duke i thirrur në protestat para zgjedhjeve vendore të 2019-s. Meta zbuloi se në fillim të qershorit, kur ndodhej për një vizitë në Gjermani ishte takuar atje edhe me Lulzim Bashën, ku kryedemokrati i ishte lutur që të anulonte zgjedhjet, sepse sipas Presidentit, Basha nuk mund ta kontrollonte dot protestën e 8 qershorit.
“Në 2 qershor, opozita mbajti protestën e 7, ku paralajmëroi një protestë finale më 8 qershor. Gjuha e urrejtjes e përdorur nga kreu i opozitës tregon se Shqipëria po shkonte drejt përshkallëzimit të tensionit social, duke rrezikuar sigurinë dhe paqen në vend. Në ditët që i paraprinë kësaj protestë që do bëhej hataja, presidenti siguroi informacione se do të kishte dhunë ndaj institucioneve. Më 6 qershor ndodhesha për një vizitë në Gjermani. Në të njëjtën kohë erdhi dhe Basha në Gjermani dhe iu lut presidentit me lot në sy, në prani të personave të tjerë që të anulonte protestën e 8 qershorit dhe po kështu të shtynte edhe zgjedhjet”, tha Meta.
“Sipas Bashës, protesta që vetë kishte organizuar për në 8 qershor do të degradonte në dhunë dhe se ai nuk e komandonte dot popullin opozitar. I trembur dhe i panikosur për përgjegjësit e tij përballë popullit opozitar të cilin në sa e sa raste e gënjente duke i premtuar rrëzimin e qeverisë, si dhe i frikësuar nga përgjegjësitë ligjore për dhunën, Lulzim Basha iu ul në gjunjë presidentit që të shtynte zgjedhjet në 30 qershor. Këtë sipas, Lulzim Bashës, presidenti duhet të bënte nga Gjermania. Sapo mbërrita në Shqipëri u njoha me situatën e fundit dhe përshkallëzimin e mundshëm. Pak minuta para nisjes së protestës bëra të njohur dekretin për shtyrjen e zgjedhjeve”, vijoi Presidenti.
Meta tha gjithashtu se Basha kishte gënjyer duke thënë se kishte mbështetjen gjermane për djegien e mandateve dhe bojkotin e zgjedhjeve të 30 qershorit 2019.
“Se ata zotërinjtë atje e kapën dhe i thanë hajde këtu: ne nuk duam dhunën, ne nuk mbështesim djegien e mandateve dhe madje as bojkotin e parlamentit”, deklaroi Meta.
Presidenti u shpreh se pas anulimit të 30 qershorit dekretoi 13 tetorin edhe me kërkesë të Lulzim Bashës. Por, nëse Partia Republikane, ajo Agrare Ambientalisite dhe Lëvizja Socialiste për Integrim paraqitën formalisht kërkesa për t’u regjistruar në zgjedhjet e 13 tetorit, Partia Demokratike nuk e bëri.
Ky detaj, sipas Metës, u përdor nga socialistët për të kundërshtuar Presidentin edhe para Komisionit të Venecias.
“Basha nuk i shërbeu aspak, jo vetëm vendit, por edhe opozitës duke e përjashtuar totalisht nga qeverisja vendore. Jo vetëm që nuk e mbështeti presidentin, por edhe kërkesa formale që i është kërkuar disa herë nga aleatët u përdor nga maxhoranca dhe për komisionin hetimor dhe në Komisionin e Venecias, për të treguar që Presidenti nuk donte të bëheshin zgjedhjet në Shqipëri, jo se Presidenti donte zgjedhje gjithëpërfshirëse. Është e qartë si drita e diellit se Lulzim Basha mbështeti kreun e rilindjes dhe për kapjen e pushtetit lokal. Ai mbështeti kreun e rilindjes dhe në sulmet ndaj Presidentit të Republikës”, tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje