.png)
Një hap prapa nga Rexhep Tajip Erdogan. Presidenti turk ka vendosur të tërhiqet kërcënimi për dëbimin e dhjetë ambasadorëve perëndimorë që kishin nënshkruar apelin për lirimin e disidentit turk, Osman Kavala.
“Ka pasur një deklaratë tjetër nga diplomatët që përmendin angazhimin e tyre ndaj nenit 41 të Konventës së Vjenës dhe mendoj se ata tani do të jenë më të kujdesshëm”, – tha Erdogan.
Diplomatët në shënjestër ishin nga Kanadaja, Franca, Finlanda, Danimarka, Gjermania, Holanda, Zelanda e Re, Norvegjia, Suedia dhe SHBA.
Agjencia turke e lajmeve “Anka”, ka bërë të ditur se prej ditësh zyrtarë të Ministrisë së Jashtme janë përpjekur të bindin presidentin që të mos urdhërojë dëbimin e tyre për të shmangur pasojat, përfshirë ato ekonomike.
Të hënën, lira turke shënoi një tjetër rekord negativ. Monedha kombëtare turke u zhvlerësua me më shumë se 2% brenda një dite, duke kapërcyer barrierën e 1 dollarit për 9,80 lirat turke dhe 1 euro për 11,40 lirat.
Në fundjavë, Erdogan shkaktoi një skandal kur deklaroi, se dhjetë ambasadorë perëndimorë do t’i shpallë persona të padëshiruar – nga protestat kundër deklaratës së tyre të solidaritetit me sipërmarrësin dhe mbështetësin e kulturës, Osman Kavala, që mbahet në burg.
Të prekur nga ky qëndrim ishin ndër të tjerë ambasadori gjerman, Jürgen Schulz dhe kolegët e tij nga Franca, SHBA-ja dhe shtatë vende të tjera.
64-vjeçari Kavala ndodhet në burg në Stamboll që nga viti 2017, ndonëse Gjykata Europiane e të Drejtave të Njeriut ka udhëzuar në vitin 2019 lirimin e tij.
Kavala është gjithashtu themeluesi i degës turke të fondacionit Shoqëria e Hapur të filantropit nga SHBA George Soros, i cili është në shënjestër prej shumë populistëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje