.png)
Komisioni Qendror i Zgjedhjeve do të shqyrtojë dy ankesa të koalicionit “Bashkë Fitojmë” për Belshin dhe Rrogozhinën ku diferenca mes kandidatëve ka qenë e vogël dhe raportet janë përmbysur pas kutive të fundit ku kanë votuar të burgosurit në të dyja zonat.
Në garën për Bashkinë e Belshit Arif Tafani i Partisë Socialiste ka fituar me 41 vota diferencë përballë Bedri Qypit të koalicionit “Bashkë Fitojmë”.
Ndërkohë, në qendrën e votimit 2565/1 të burgut të Belshit kandidati socialist ka marrë 25 vota, ndërsa kandidati demokrat vetëm 4 vota. Nga 41 vota që është diferenca mes dy kandidatëve, 21 vota më shumë Tafani i PS-së i ka marrë vetëm në kutinë e burgut.
Një tjetër bashki që do të duhet të shqyrtohet në KQZ është edhe Rrogozhina ku Edison Memolla i PS-së ka fituar me 30 vota më shumë se Shkëlqim Hoxha i BF-së.
Kandidati i “Bashkë Fitojmë” ishte në avantazh deri në kutinë e fundit me numër 2224/01 që i korrenspondon burgut të Rrogozhinës ku kandidati socialist ka marrë 92 vota, ndërsa kandidati i BF-së vetëm 12 vota.
Edhe në disa qendra të tjera votimi në të gjithë vendin ku janë mbajtur zgjedhje, rezulton se kandidatët socialistë janë votuar masivisht.
Në Tiranë në qendrën e votimit 1690 që i korrenspondon burgut të grave, 45 vota i ka marrë Erion Veliaj dhe vetëm 1 votë Belind Këlliçi.
Ndërsa në burgun 302, që i korrenspondon qendrës së votimit 1967, Veliaj ka marrë 50 vota, Belind Këlliçi 48, Roland Bejko 6, Arlind Qori 4, Lajla Përnaska 2 dhe Marko Dajti 1 votë.
Në qendrën e votimit 0938/02 në burgun e Burrelit kandidati socialist Agron Malaj ka marrë 55 vota ndërsa kandidati i BF-së Skënder Gjuci ka marrë 10 vota.
Të burgosurit në Elbasan kanë votuar gjithashtu platformën e Gledian Llajtjes për qytetin teksa i kanë dhënë atij 58 vota, ndërsa Luçiano Boçi ka marrë 32 vota.
Me një diferencë të thellë ka fituar edhe Bukurosh Maçi i PS-së në qendrën e votimit të burgut të Peqinit kur ka marrë 119 vota, ndërsa Mustafa Pashja ka marrë vetëm 9 vota.
E njëjta gjë ka ndodhur edhe në burgun e Drenovës në Korçë ku kandidati Sotiraq Filo ka marrë 97 vota, ndërsa Ledina Alolli ka marrë 31 vota.
Në burgun e Tepelenës Tërmet Peçi i PS-së ka fituar 65 vota, Baftjar Imeri i BF-së 3 vota ndër Sokol Guga i PD-së 2 vota.
Në qendrën e votimit në burgun e Shënkollit në Lezhë kandidati i PS-së, Pjerin Ndreu ka fituar 82 vota, ndërsa Pashk Gjoni i BF-së ka marrë 33 vota.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje