.png)
Ambasadorja e SHBA-ve në Tiranë Yuri Kim ishte të mërkurën në selinë e PS.
Ambasadorja Kim zhvilloi një takim me sekretarin e përgjithshëm të PS Damian Gjiknuri.
Ambasadorja e SHBA mbërriti rreth orës 10:40 në selinë rozë.
“Zgjedhjet e ardhshme vendore të 14 Majit, situata aktuale politike në vend dhe rekomandimet e ODIHR-it pas procesit të fundit elektoral ishin në qendër të diskutimit. E garantova ambasadoren për vendosmërinë e Partisë Socialiste për të kontribuar aktivisht për një proces zgjedhor në përputhje me standardet më të mira ndërkombëtare. Si gjithnjë, Shtetet e Bashkuara të Amerikës mbeten në krah të Shqipërisë në përpjekjen për të garantuar zgjedhje të lira e të ndershme”, komentoi Gjiknuri pas takimit.
Takimi mes tyre mbahet në një moment delikat për politikën në vend.
Brenda dy ditësh Ilirjan Celibashi duhet të vendosë për siglën e PD-së në zgjedhje, Enkelejd Alibeaj ka marrë zyra të reja me qira si kryetar i komanduar ndërsa nuk shihet asnjë mundësi bashkëpunimi mes palëve brenda PD-së.
Në anën tjetër nuk është bërë asnjë lëvizje apo veprim konkret për përmirësimin e rekomandimeve të OSBE-ODIHR për zgjedhjet e ardhshme lokale. Gjithçka ka ngecur tek konflikti politik.
Pas Gjiknurit, Kim takoi Enkelejd Alibeajn në Kryesinë e Kuvendit dhe Ilir Metën në selinë e Partisë së Lirisë.
“Diskutuam për rekomandimet e ODIHR, shqetësimet mbi përdorimin e administratës dhe pastërtinë e kandidatëve. Shqetësime këto të ngritura dhe më parë nga opozita dhe që kanë shoqëruar problematikën e proceseve të fundit zgjedhore në Shqipëri.
Në emër të PD garantova ambasadoren e SHBA për vullnetin e mirë tonin për t’u përfaqësuar denjësisht në këto zgjedhje duke zbatuar rekomandimet e ODIHR, duke ndarë me të shqetesime të ndryshme përfshirë dhe rolin e medias, para dhe gjatë fushatës elektorale. Në fund të bisedës e falenderova për mbështetjen e vazhdueshme që SHBA i kanë dhënë Shqipërisë dhe shqiptarëve në rrugëtimin e gjatë dhe të vështirë të zhvillimeve demokratike” komentoi Alibeaj ne Facebook.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje